Danimarka ka ndaluar të gjitha fluturimet e dronëve civilë këtë javë përpara një samiti të Bashkimit Evropian në Kopenhagen, tha të dielën ministri i Transportit.
Ministria tha se vendimi u mor me qëllim që të "thjeshtësohej puna e sigurisë" për policinë, dhe se ata nuk mund të pranonin "dronë të huaj që krijojnë pasiguri dhe përçarje", transmeton Telegrafi.
Danimarka është një nga disa vende evropiane që kanë raportuar "incidente me dronë" në javët e fundit, me dronë të parë mbi bazat ushtarake daneze deri të shtunën.
Ministrat e Mbrojtjes nga 10 vende të BE-së kanë rënë dakord të krijojnë një "mur dronësh", në përgjigje të pamjeve dhe NATO thotë se ka "rritur vigjilencën" në të gjithë Baltikun.
Në deklaratën e tyre që njoftonte ndalimin, ministria e Transportit tha se policia ishte në "gatishmëri të shtuar ndjeshëm" përpara samitit të kësaj jave, dhe se ata duhej të "kujdeseshin për danezët dhe mysafirët tanë".
Ndalimi do të mbetet në fuqi deri më 3 tetor dhe shkeljet mund të rezultojnë në një gjobë ose burgim deri në dy vjet.
Danimarka aktualisht mban presidencën e radhës të Këshillit të BE-së.
Dronë të paidentifikuar janë raportuar në Danimarkë që nga 22 shtatori, kur pamjet e tyre detyruan mbylljen e aeroporteve të Kopenhagenit dhe Oslos.
Aeroportet e Aalborgut dhe Billundit u detyruan gjithashtu të pezullonin operacionet javën e kaluar për shkak të aktivitetit të dronëve. /Telegrafi/
