Daçiq mohon lajmin se Serbia e ka ndalur fushatën e çnjohjeve të Kosovës

Ministri i Punëve të Jashtme i Serbisë, Ivica Daçiq, i ka vlerësuar si “gënjeshtër të madhe” pretendimet e mediave se Serbia ka pezulluar fushatën për tërheqjen e njohjes së Kosovës.

“Serbia nuk e ka ndalur fushatën e tërheqjes së njohjeve të Kosovës dhe as nuk do të ndalet nëse të gjithë të tjerët nuk ndalojnë fushatën për njohje”, ka thënë Daçiq, përcjell Telegrafi.

Deklarata e tij vjen si përgjigje të një shkrimi të Radio Evropa e Lirë se Serbia ka pezulluar fushatën, duke cituar burime diplomatike pa emër në Bruksel.

Lexo po ashtu REL: Serbia ndalë fushatën kundër pavarësisë së Kosovës për t’i hapur rrugë dialogut

“Serbia ka thënë publikisht për vite me radhë se do të ndalojë fushatën e tërheqjes së njohjes vetëm nëse të gjithë të tjerët ndalojnë fushatën për njohjen e Kosovës dhe anëtarësimin në organizatat ndërkombëtare. Meqenëse nuk është kështu, Serbia nuk e ka ndaluar fushatën e tërheqjes së njohjes së Kosovës. Kur ata të ndalojnë, do të ndalemi edhe ne”, ka thënë Daçiq në një prononcim për Tanjug.

Sipas REL, duke u thirrur në një burim të lartë diplomatik pa emër në BE se “palët në Serbi, si pjesë e një vullneti të mirë për të krijuar një atmosferë të favorshme për vazhdimin e dialogut, kanë rënë dakord të mos vazhdojnë këtë fushatë”. /Telegrafi/