“Çmenduri nëse e fitojmë titullin në derbi ndaj Milani”- Calhanoglu kujton ofendimet që mori kur kuqezinjë dolën kampion

Hakan Calhanoglu ishte nga ata që vuajtën më shumë titullin e fituar nga Milani dy vite më parë në Serie A, pasi turku sapo ishte larguar nga kuqezinjtë për t’u bashkuar me Interin dhe u vu në shënjestër nga ish-shokët e skuadrës dhe tifozët gjatë festimeve në Milano.

Megjithatë dy vite më vonë, turku ka mundësinë të “hakmerret”, këtë herë duke fituar titullin kampion me Interin, pikërisht në derbin e 22 prillit në “San Siro”, aty ku Milani do të jetë pritës dhe 95% e tifozerisë në tribuna, do të jenë ata kuqezi.

“Do të ishte çmenduri të fitonim titullin në derbi, pikërisht në stadiumin e mbushur kuqezi. Do të përpiqem të ruaj qetësinë sigurisht, pasi dy vite më parë vuajta shumë faktin që u vura në shënjestër”.

“Megjithatë mbi të gjitha shpresoj që të jetë një derbi i bukur, të vendoset nga fusha dhe që festimet të shkojnë në mënyrën më të mirë të mundshme”, ka thënë Calhanoglu.

Interin vetëm matematika e ndan nga titulli i 20 kampion në histori, falë paraqitjeve bindëse në fushë. /Telegrafi/