Çitaku: Suspendimi i Rusisë në Këshill të Evropës, momentum që Kosova ta shfrytëzoj për anëtarësim në këtë institucion

Nënkryetarja e Partisë Demokratike të Kosovës, Vlora Çitaku, ka thënë sot në një konferencë për media se Qeveria e Kosovës duhet të angazhohet dhe të punoj për anëtarësimin e Republikës së Kosovës në Këshillin e Evropës.

Çitaku theksoi se deri tani kjo nuk ka qenë e mundur për shkak të ndikimit të Rusisë, por me krijimin e një situatë e re ku kjo fundit është suspenduar nga Këshilli i Evropës për shkak të agresionit ndaj Ukrainës, është momentumi që Qeveria e Kosovës të nisë procedurën e anëtarësimit në këtë strukturë të rëndësishme.

“Anëtarësimi i Kosovës në Këshillin e Evropës përbën një përfitim të shumëfishtë për vendin tonë në drejtim të fuqizimit të demokracisë, sundimit të ligjit dhe bashkëpunimit në familjen evropiane e më gjerë. Në mes tjerash, është përfitim për qytetarët tanë, të cilëve do ju mundësohej qasja në drejtësi në Gjykatën Evropiane të të Drejtave të Njeriut në Strasburg, aty ku zbatohen parimet e drejtësisë së Kartës Evropiane të Drejtave të Njeriut, e cila edhe ashtu është e inkuadruar si entitet brenda Kushtetutës së Republikës së Kosovës. Neni 3 i Statutit të Këshillit të Evropës, obligon një shtet që të respektojë parimin e sundimit të ligjit si dhe respektojë të drejtat e njeriut, dy shtylla që ne si shtet i kemi të konsoliduara tashmë si kritere.”, tha Çitaku.

PDK vlerëson se kjo është një çështje emergjente tani për tani dhe si parti lidere e opozitës, do ta mbështesë fuqishëm qeverinë në këtë objektiv shtetëror dhe në hapat tjerë që duhet të ndërmarrë për anëtarësim në NATO dhe BE

“Reagimi emergjent ndaj kërcënimeve rreth sigurisë, nuk mund të zëvendësojë në mënyrë afatgjatë, atë për të cilën Kosova ka nevojë sot më shumë se kurrë, përkatësisht anëtarësimin në NATO dhe Bashkim Evropian. Për këtë arsye, duke parë zhvillimet politike që po ndodhin kudo përreth nesh, ne i bëjmë thirrje qeverisë sonë që pa humbur kohë, të angazhohet në rrafshin diplomatik, për njohje nga pesë vendet anëtare të BE-së, të cilat nuk e kanë njohur ende Kosovën.”, theksoi Çitaku.

Ajo tha se duke parë kërcënimin që po i bëhet sigurisë evropiane nga agresioni rus në Ukrainë, gjë që mund të cenojë edhe Republikën e Kosovës, PDK i ka kërkuar qeverisë që të ndajë 100 milion euro për ushtrinë.

“Përballë një kërcënimi të tillë të sigurisë evropiane, e cila fare lehtë mund të cenojë edhe Republikën e Kosovës, ne i kemi kërkuar qeverisë që menjëherë të rishikojë buxhetin për këtë vit, për të shtuar edhe 100 milion euro për ushtrinë, në mënyrë që Kosova t’i rrisë kapacitetet e veta ndërsa për çdo vit, me buxhet që përfshinë së paku 2% të GDP-së së vendit.”, tha Çitaku.

Po ashtu, PDK ka kontribuar dhe mbështetur Rezolutën e Kuvendit, përmes së cilës Kosova ka shënuar dallimin e qartë në mbështetje të Ukrainës, me propozime konkrete, siç është ndarja e një buxheti për të ndihmuar qytetarët e këtij vendi, si dhe përgatitjen për pritjen e së paku 5000 qytetarëve ukrainas të shpërngulur nga lufta. /Telegrafi/