Chelsea ka hapur diskutime të drejtpërdrejta me Rennes mbi transferimin e mundshëm të qendërmbrojtësit 20-vjeçar Jeremy Jacquet gjatë afatit kalimtar të janarit.
Klubi i Ligës Premier është i etur për të sjellë lojtarin e ri francez dhe po përgatitet të paraqesë ofertën e tyre të parë zyrtare para afatit të transferimeve.
Jacquet ka bërë përshtypje me performancat e tij këtë sezon, duke tërhequr interes nga disa klube të mëdha evropiane, përfshirë Bayern Munich, Manchester United dhe Liverpool, por Chelsea duket se është më i avancuari në negociata.
Sipas gazetarit Fabrice Hawkins, Blutë janë gati të paraqesin një ofertë prej rreth 50 milionë eurosh për mbrojtësin.
Mbetet e paqartë nëse kjo shumë përputhet me vlerësimin e Rennes për lojtarin, i cili është vendosur si një pjesë kyçe e mbrojtjes së tyre në Ligue 1.
Ndryshe, Jacquet ka zhvilluar 17 ndeshje këtë sezon me Rennes, ndërsa është reprezentues i rregullt i Francës nga grupmosha U-17 deri te U-21, ku luan ende.
Një marrëveshje e suksesshme do t’i siguronte trajnerit të ri Liam Rosenior një shtesë të re dhe me potencial të lartë në qendër të mbrojtjes, veçanërisht pasi klubi vazhdon të menaxhojë rikuperimin afatgjatë të Levi Colwill. /Telegrafi/
