Botë Nga Bota Amerika

Çfarë po ndodh me Trumpin?

Para 1 viti

Ish-presidenti amerikan Donald Trump nuk do të lejohet të kandidojë për postin e presidentit në dy shtete amerikane, Kolorado dhe Maine. Por, çfarë do të thotë për zgjedhjet e përgjithshme të vitit të ardhshëm në SHBA?

Trump është kandidati kryesor për të qenë i zgjedhuri i republikanëve në zgjedhjet e nëntorit të vitit 2024 dhe për të sfiduar presidentin Joe Biden për Shtëpinë e Bardhë, raporton BBC, përcjell Telegrafi.

Ekipi i tij i fushatës i përshkroi të dyja vendimet si “mizore” dhe “tentativë për vjedhje të zgjedhjeve”.

Zyrtarja më e lartë e zgjedhjeve në Maine vendosi se Trump nuk ishte i përshtatshëm për të kandiduar për shkak të veprimeve të tij rreth trazirave të 6 janarit (2021) në Kapitolin amerikan. Gjykata më e lartë e Kolorados lëshoi një vendim të ngjashëm, të paprecedentë, vetëm disa ditë më parë.

Por, mbetet e paqartë nëse emri i Trumpit do të shfaqet në fletën e votimit kur të dyja shtetet do të zgjedhin kandidatin e tyre republikan në muajt e ardhshëm, pasi të dyja vendimet janë në pritje ndërkohë që procesi i apelit zhvillohet.

Pse shteti Maine e mori këtë vendim?

Ndryshe nga Kolorado, ku Gjykata e Lartë e shtetit mori vendimin për ta diskualifikuar Trumpin, në Maine u vendos nga zyrtarja më e lartë elektorale.

Sekretarja e shtetit të Maine, Shenna Bellows, një demokrate lëshoi një vendim prej 34 faqesh që thoshte se Trump duhet të hiqet nga votimi i tij primar republikan për shkak të seksionit 3 të amendamentit të 14-të.

Seksioni 3 skualifikon njerëzit që përfshihen në “kryengritje ose rebelim” nga mbajtja e posteve federale.

Sipas urdhrit të saj thuhej se “Trump gjatë disa muajve, e deri më 6 janar 2021, përdori një narrativë të rremë të mashtrimit zgjedhor për të ndezur mbështetësit e tij dhe për t’i drejtuar ata në Kapitol”.

Bellows, një zyrtare e zgjedhur, u akuzua se vendimi ishte i motivuar politikisht nga ekipi i fushatës së Trump. Ajo e mohoi këtë dhe tha se vendimi ishte “i plotë dhe i bazuar në sundimin e ligjit”.

Duke folur për BBC News pas vendimit të saj, Bellows tha se ishte detyra e saj të mbështeste ligjet zgjedhore në shtetin e saj dhe se ajo shpresonte se “Gjykata e Lartë do ta zgjidhte këtë çështje në mbarë vendin”.

Çfarë ndodhi në Kolorado?

Më 19 dhjetor, Gjykata e Lartë e Kolorados tha se gjeti “prova të qarta dhe bindëse që ish-presidenti Trump mori pjesë në kryengritje”.

Ishte e hera e parë që Seksioni 3 ishte përdorur për të skualifikuar një kandidat presidencial.

Vendimi i gjatë prej 213 faqesh thoshte se veprimet e Trumpit që çuan në trazirat e 6 janarit 2021 përbënin kryengritje.

Avokatët e tij kishin argumentuar në Kolorado se ai nuk duhet të skualifikohej sepse nuk mbante përgjegjësi për trazirat.

Ata gjithashtu vunë në dukje se Trumpit nuk i është ngritur aktakuza për nxitje të kryengritjes.

A do të ketë të drejtë Trumpi të kandidojë në zgjedhjet e vitit 2024?

Po, pasi këto vendime zbatohen respektivisht vetëm për në Kolorado dhe Maine.

Disa orë pas vendimit të Maine, sekretari i zgjedhur i shtetit të Kalifornisë, një demokrat, injoroi thirrjet për ta larguar Trumpin nga votimi paraprak, si kandidat në atë shtet – duke thënë se kjo ishte një çështje e gjykatave. Gjykata e lartë e Miçiganit këtë javë refuzoi të dëgjojë një çështje që kërkon të skualifikojë Trumpin.

Ish-presidenti amerikan është shumë përpara rivalëve të tij republikanë, kështu që mund të fitojë ende nominimin e partisë së tij pa konkurruar në Kolorado ose Maine.

Sikurse në Kolorado ashtu edhe në Maine, Joe Biden fitoi kundër Donald Trumpit në vitin 2020 me një diferencë të madhe dhe nuk ka gjasa që Trumpit t’i duhet të fitojë shtetet për të hyrë edhe një herë në Shtëpinë e Bardhë.

Çfarë ndodh më pas?

Tani, ka gjasa që Gjykata e Lartë e SHBA-së të ndërhyjë për të ofruar një vendim që do të zbatohej në nivel kombëtar.

Kjo për shkak se Partia Republikane e Kolorados ka apeluar vendimin e shtetit në Gjykatën e Lartë.

Gjykata e lartë amerikane do të vendosë nëse do ta marrë çështjen në vitin e ri, por nuk është e qartë se kur.

Emri i Trumpit do të mbetet në fletën e votimit në Kolorado derisa Gjykata e Lartë të marrë një vendim ose, në një rezultat më pak të mundshëm, të vendosë të mos e marrë çështjen.

Vendimi i Maine është gjithashtu në pritje të një apeli ligjor në gjykatat e shtetit. Çdo vendim i Gjykatës së Lartë të SHBA-së mund ta zëvendësojë këtë dhe të zbatohet në nivel kombëtar. /Telegrafi/