Çështja e impianteve të plehrave në Shqipëri, PD: Ahmetaj dhe Gjiknuri udhëtuan disa herë me pronarët e shpallur në kërkim

Deputetja e Partisë Demokratike të Shqipërisë, Orjola Pampuri ka akuzuar sot Zëvendëskryeministrin Arben Ahmetaj dhe ish-Ministrin e Energjisë, Damian Gjiknuri se gënjyen një ditë më parë gjatë dëshmisë së tyre në Komisionin Hetimor për çështjen e impianteve të plehrave, të njohura si inceneratorët.

Pampuri, teksa ka publikuar disa dokumente nga sistemi TIMS [bazë të dhënash elektronike për hyrjet dhe daljet nga vendi e administruar nga Policia e Shtetit], pretendon se aty vërtetohet se pronarët e inceneratorëve Mirel Mertiri, Klodian Zoto dhe Stela Gugallja nuk ishin të panjohur për qeveritarët.

“Mirel Mertiri, Klodian Zoto dhe Stela Gugallja nuk ishin të panjohur për qeveritarët dhe ardhja e tyre nuk ishte rastësi. Mjafton të shikoni historinë e udhëtimeve të Ahmetajt dhe Gjiknurit për të kuptuar se ata njiheshin”, ka thënë Pampuri.

Sipas deputetes së PD-së, ata udhëtonin bashkë që prej 2012, por të dhënat flasin për një njohje më të hershme mes tyre.

“Gjithçka për aferën e inceneratorëve ka qenë e planifikuar”, ka shtuar Pampuri.

“Po të hedhim një sy të historikut i udhëtimeve të Ahmetajt dhe Gjiknurit rezulton se nga 27 janari 2012 deri më 16 tetor 2019, Arben Ahmetaj ka udhëtuar 12 herë me dy pronarët e kompanive të inceneratorëve, Mirel Mërtiri dhe Klodian Zoto and nga 27 janari 2012 deri më 23 korrik 2019, Damian Gjiknuri ka udhëtuar 6 herë me dy pronarët e kompanive të inceneratorëve, Mirel Mërtiri dhe Klodian Zoto,” Pampuri ka sqaruar.

Lexo po ashtu Akuzat për impiantet e plehrave, reagon kryeministri Rama

Mërtiri dhe Zoto janë sot në kërkim ndërkombëtar për korrupsion aktiv, pastrim të produkteve të veprës penale, të kryera në bashkëpunim, për aferën korruptive të inceneratorëve, ka thënë Pampuri, duke shtuar se “miqtë e tyre politikanë, të veshur njëri me kostumin e zëvendëskryeministrit dhe tjetri me atë të sekretarit të përgjithshëm të Partisë Socialiste, vazhdojnë vjedhjet të pa shqetësuar”.

Pampuri ka nënvijëzuar se 430 milionë euro janë vjedhur me dijeni te plotë të Arben Ahmetajt, Damian Gjiknurit, Sekretarit të Përgjithshëm të Kryeministrit, Ëngjëll Agaçit, Kryetarit të Bashkisë Tiranë, Erion Veliajt, dhe ish-Ministrit të Mjedisit, Lefter Kokës.

Në Shqipëri po kryhen dy hetime paralele për dyshime mbi abuzime fondesh dhe korrupsion në ndërtimin dhe operimin e inceneratorëve të Tiranës, Fierit dhe Elbasanit. Hetimet por kryen nga një Komision Hetimor Parlamentar dhe nga Prokuroria e Posaçme, i njohur si SPAK.

Kryeministri Edi Rama pritet të dëshmoj sot në Komision Hetimor Parlamentar. /Telegrafi/