I caktohen 40 ditë paraburgim shtetsit turk, i dyshuar për terrorizëm

Gjykata Themelore në Prishtinë ka aprovuar kërkesën e Prokurorisë Speciale të Republikës së Kosovës për caktimin e masës së paraburgimit kundër të kërkuarit U.T, për shkak të veprës penale Organizimi dhe pjesëmarrja në grup terrorist.

Të kërkuarit U.T, i është caktuar masa e paraburgimit në kohëzgjatje prej 40 ditësh dhe atë duke filluar prej datës 27.10.2017 gjerë më 06.12.2017.

“I akuzuari U.T, kërkohet  për veprën penale organizimi dhe pjesëmarrja në grup terrorist, sipas kërkesës së Ministrisë së Drejtësisë së Republikës së Turqisë të datës 16 dhe 19 tetor 2017, për ekstradimin e shtetasit të vet U.T, si dhe nga Gjykata Penale e shkallës së parë nr.2 Hatay, e cila ka nxjerrë urdhërarrest kundër të cilit në shtetin e Turqisë janë duke u udhëhequr hetimet penale në drejtim të veprës penale organizata e armatosur nga neni 314 të Kodit Penal të Republikës së Turqisë. Gjykata ka analizuar të gjitha arsyet për caktimin e paraburgimit kundër të kërkuarit U.T, sepse po të gjendej i kërkuari në liri, i njëjti mund të ikë, të largohet apo të fshihet dhe do të jetë i pakapshëm nga organet e ndjekjes, pasi që i njëjti është shtetas i Republikës së Turqisë dhe kërkohet nga autoritetet e Republikës së Turqisë”, thuhet në komunikatën e Gjykatës.

Pala ka të drejtë ankese kundër këtij vendimi në Gjykatën së Apelit të Kosovës./Telegrafi/