Buzhala: Qeveria dhe KEK-u po bëjnë gabim prej 170 milionë eurosh në rikonstruimin e njësisë A3

Analisti Viktor Buzhala ka kritikuar planet e Qeverisë së Kosovës dhe Korporatës Energjetike të Kosovës (KEK) për rikonstruimin kapital të njësisë A3, duke e cilësuar këtë veprim si një gabim të kushtueshëm.

Sipas tij, ky projekt ka një kosto fillestare prej 170 milionë eurosh, që pritet të rritet ndjeshëm. Buzhala ka shtuar se në vend të rehabilitimit të kapaciteteve të vjetra, duhet të bëhet zëvendësimi me njësi të reja.

“Aktualisht Qeveria e Kosovës bashkë me KEK-un i kanë planet për rikonstruimin kapital të njësisë A3. Këtu është duke u bërë një gabim, kostot fillestare janë 170 milionë euro, që pritet me qenë shumë me e madhe. Dhe është duke u bërë gabim, se nuk bën me u bë rikonsturimi kur nuk mundet me u bë ndërtimi i ri.

Pra nuk po flasim për kapacitete të reja, por për zëvendësim të kapaciteteve ekzistuese. Dhe unë kam informata të sakta që ka kompani, se problematike në këtë rast është janë gjeneratorët dhe turbinat.

Dhe ka kompani të cilat kanë të porositura në kompanitë globale… i kanë turbinat dhe gjeneratorë dhe mund të bëjnë zëvendësimin e kapaciteteve të vjetra me të reja. Nuk ka nevojë me u rehabilitu, e me na kushtu një dreq e gjysmë dhe këtë gabim është duke e bërë Qeveria e Kosovës.  Ky është gabim. Duhet të bëhet e re aty afër, është zëvendësim kapacitetesh”, ka thënë Buzhala në Debat Plus.