Bulizmi, fenomen shqetësues nëpër shkollat e Maqedonisë

Unioni i nxënësve të shkollave të mesme të Republikës së Maqedonisë ka realizuar fushatën kundër bulizmit në shkollat e mesme. Me këtë rast, Unioni ka kryer një hulumtim përmes një pyetësori, ku pjesëmarrës kanë qenë rreth 2000 nxënës të shkollave të mesme në Tetovë, shkruan gazeta KOHA. Ky pyetësor ka patur për qëllim të mësojë rreth qëndrimit të tyre ndaj kësaj dukurie. Sipas nxënësve, 83% e pjesëmarrësve në hulumtim vlerësojnë se bulizmi është problematikë që duhet trajtuar dhe parandaluar në shkollat tona.

“Nga hulumtimet sipërfaqësore që kemi bërë nëpër shkolla pritshmëritë tona ishin që bulizmi fizik është më i pranishëm midis nxënësve. Por rezultatet e dala nga ky pyetësor treguan që 79 për qind e të anketuarve vlerësojnë se më i pranishëm është bulizmi i ashtuquajtur i padukshëm, ose bulizmi psiqik, edhe atë më shumë në relacionin mësimdhënës – nxënës, por edhe midis vetë nxënësve. Kjo sjell në përfundim se ‘dhuna psiqike dhe verbale, me raste, përdoret si mjet edukimi në shkollat e mesme’ në vend, dhe kjo paraqet një rrezik për ardhmërinë e nxënësve të cilët më vonë në jetë mund të përballen me pasoja serioze, sidomos në gjendjen emocionale dhe shpirtërore”, tha Bledni Hodai, kryetar i Unionit të nxënësve shqiptarë. Për më tepër, u shpreh ai, 45 për qind e nxënësve nuk janë të sigurt se mësimdhënësit tentojnë të pakësojnë bulizmin nëpër shkolla, 19 për qind nuk pajtohen, kurse 39 për qind e nxënësve pajtohen që mësimdhënësit bëjnë mjaftueshëm për parandalimin e bulizmit.

“Një e dhënë tepër shqetësuese nga pyetësori është se 44 për qind e nxënësve kanë qenë viktima të bulizmit, dhe ky numër sipas gjitha gjasave shkon në rritje, derisa bulizmi po shndërrohet në një rutinë ditore në shkollat tona. Nga kjo, shumica e nxënësve, afro 81 për qind pranojnë që kanë qenë viktimë e bulizmit në ambientet shkollore si nga shokët, ashtu edhe nga profesorët dhe nga organet më të larta në shkollë”, theksoi Hodai, ndërsa shtoi se fajtorë për bulizmin janë edhe psikologët.

“Ne ndjejmë se fajin më të madh për rritjen e fenomenit të bulizmit e kanë zyrat e psikologëve në shkolla. Ata duhet të mbajnë përgjegjësi për këtë gjendje, pasi nga ana e tyre nuk është bërë asnjë hulumtim në lidhje me këtë çështje, dhe fatkeqësisht Unioni deklaron se ata nuk janë të njohur edhe me termin se çfarë do të thotë ‘bulizëm’. Ne këtë e quajmë si mosfunksionim të zyrës së psikologëve në shkolla, pasi ironia më e madhe është që edhe nxënësit nuk i dinë se kush janë psikologë në shkollat të cilët ata mësojnë. Këto të dhëna paraqesin statistika shumë shqetësuese, të cilat do të duhej të nxisnin një serë hulumtimesh më konkrete dhe më profesionale nga institucionet kompetente për të parandaluar bulizmin e shkaktuar nga mësimdhënësit tek nxënësit”, tha Hodai. Ata theksojnë se nuk do ta tolerojnë bulizmin në ambientet shkollore në asnjë mënyre dhe bëjnë apel deri tek institucionet përgjegjëse dhe kompetente për këtë çështje./koha.mk/