Bruto produkti vendor në tremujorin e tretë 2024 shënon rritje

Sipas të dhënave të ASK-së bruto produkti vendor në tremujorin e tretë 2024 shënon rritje reale për 4,05% krahasuar me tremujorin e njëjtë të vitit paraprak.

Agjencia e Statistikave të Kosovës përmes një komunikate për media ka njoftuar se ka  publikuar të dhënat e Bruto Produktit Vendor për tremujorin e tretë 2024, sipas aktiviteteve ekonomike dhe me qasjen e shpenzimeve, me çmime aktuale dhe me çmime të vitit paraprak.

Aktivitetet ekonomike që kishin rritje në këtë tremujor janë: Industria përpunuese 5,30%; Industria nxjerrëse; përpunuese; energjia elektrike, gazi, avulli dhe furnizimi me ajër; furnizimi me ujë; aktivitetet e trajtimit dhe menaxhimit të mbeturinave, rehabilitimit 4,60%; Aktivitete shkencore, profesionale dhe teknike; aktivitete të shërbimeve administrative dhe mbështetëse 3,78%; Ndërtimtaria 3,60%; Arte, argëtim dhe çlodhje, aktivitete të prodhimit të mallrave të familjeve për përdorim të vet dhe shërbime të tjera 3,30%; Informacioni dhe komunikimi 2,84%; Bujqësia, pyjet dhe peshkimi 2,24%; Tregtia me shumicë dhe me pakicë; riparimi i automjeteve dhe motoçikletave; transporti dhe magazinimi; aktivitetet e akomodimit dhe shërbimit ushqimor 3,15%; Aktivitetet financiare dhe të sigurimit 1,22%; Aktivitete të pasurive të paluajtshme 0,76% dhe Administrata publike 0.74%.

Komponentët e BPV-së sipas metodës së shpenzimeve që kishin rritje janë: Eksporti i mallrave dhe shërbimeve 9,62%; Importi i mallrave dhe shërbimeve 9,23%; Formimi i bruto kapitalit 7,62% Shpenzimet e konsumit final të ekonomive shtëpiake dhe IJPSHESH 3,24% dhe Shpenzimet e kosumit final të qeverisë 2.38%.