Britanikut që po festonte 100-vjetorin e lindjes iu bë dhuratë vetura që e voziti rreth 60 vjet më parë

Është një shpërblim i mjaftueshëm vet fakti që ju keni arritur të festoni në ditëlindjen tuaj të 100-të, por marrja e një makine luksoze Bentley për dhuratën e njëqindvjetorit tuaj është “qershia mbi tortë”.

Dhe ajo do të ishte edhe më e veçantë sidomos kur është ajo që keni përdorur për të vozitur dikur, siç ka ndodhur me rastin e një britaniku.

Sipas mediave të huaja, përcjell Telegrafi, Eddie Hughes nga Lacock, Britani e Madhe, u befasua nga familja e tij kur i dhanë çelësat e një Bentley S3 që ai voziste si shofer në vitin 1964.

Hughes e kishte marrë makinën nga fabrika për punëdhënësin e tij dhe e kishte vozitur atë për një vit para se të kalonte në një punë tjetër.

Djali i tij Ron, 69 vjeç, filloi kërkimin për të gjetur makinën dy dekada më parë pasi babai i tij i tha se “ishte makina më e mirë që ai kishte drejtuar ndonjëherë”.

Ron i tha SWNS se ai kishte kontaktuar klubet Bentley në të gjithë botën gjatë viteve, por vetëm kur djali i tij, James, kohët e fundit futi numrin e regjistrimit në një kërkim në Google dhe gjeti makinën për shitje në SHBA – ata ishin në gjendje për ta gjetur atë.

Ata blenë sedanin ngjyrë kafe nga Beverly Hills Car Club dhe e dërguan atë në Mbretërinë e Bashkuar për një total prej 44,000 dollarë para se ta dërgonin në dyqan për ta riparuar.

“Makina ishte shumë e kompletuar me pjesët e saj origjinale, por gjendja e saj e funksionimit ishte e dobët derisa të rregullohej”, tha Ron.

“Unë thjesht nuk mund ta besoja. Ishte e mrekullueshme ta shihja përsëri”, tha Eddie.

Eddie tha se ai ende udhëton pa probleme, por ai për fat të keq nuk do të ketë mundësi ta drejtojë atë në rrugë pasi është gati “të dorëzojë” patentën e shoferit pas 83 vjetësh.

“Unë do t’ia lë këtë familjes sime”, ka thënë ai. /Telegrafi/