“Bota jonë” i regjisores Luana Bajrami shfaqet krahas filmave të tjerë ndërkombëtarë në Festivalin e Filmit në Venecia

Filmi “Bota jonë” i regjisores shqiptare, Luana Bajrami, është shfaqur së fundmi në Festivalin e Filmit në Venedik.

Këtë film e ndoqën kryeministri Albin Kurti bashkë me regjisorin Bajramin, producentët Valbone Rahmani dhe Eric Toledano si dhe protagonistët e tjerë të përfshirë në projekt.

Lajmi është bërë i ditur nga Ministria e Kulturës, Rinisë dhe Sportit me një postim të shpërndarë në rrjete sociale.

Postimi i plotë i tyre (pa ndërhyrje):

“”Bota jonë” filmi i regjisores 22 vjeçare, Luana Bajrami, u shfaq mbrëmë në Festivalin e Filmit në Venedik, dhe po garon në kategorinë “Orizzonti Extra”.

Filmin e ndoqën kryeministri Kurti, bashkë me regjisoren Bajrami, producentët Valbone Rahmani dhe Eric Toledano, aktorët e roleve kryesore, Elsa Mala, Albina Krasniqi, Don Shala, Aurora Ferati, Gani Rrahmani, Uratë Shabani dhe Tristan Halilaj, ambasadoren Lendita Haxhitasim, Blerta Zeqirin, drejtoren e QKK-së si dhe Rozafa Imamin, këshllitare politike në MKRS.

I gjithë ekipi u përshëndet dhe u përgëzua nga Roberto Ciccutto, Presidenti i Bienales së Venedikut gjatë koktejit të organizuar nga Ambasada e Kosovës në Itali.

“Bota jonë” është produksioni i parë që përfiton nga marrëveshja e bashkëprodhimit kinematografik që Franca dhe Kosova nënshkruan në Festivalin e Filmit në Kanë 2022. Para tij, në Venedik janë shfaqur “House keeping for beginners”, me aktore Rozafa Çelaj e Ilire Vinca, për të vazhduar me “A Short Trip” të Erenik Beqirit nga Shqipëria, ku luajnë edhe Luana Bajrami e Arben Bajraktaraj”. /Telegrafi/