Bordi i Telekomit: Deklaratat e ministrit Valdrin Lluka, po e dëmtojnë afarizmin e Telekomit, lidhen edhe me procesin e privatizimit

Bordi i Drejtorëve të Telekomit të Kosovës kanë reaguar ndaj siç i kanë quajtur ata “Deklaratat politike të ministrit të Zhvillimit Ekonomik, Valdrin Lluka. Sipas tyre, deklaratat e ministrit në këtë kohë që është Telekomi , janë tendencioze.

Sipas Bordit të Telekomit, ministri Lluka, nuk është treguar bashkëpunues me ta.

“Ne në vazhdimësi kemi kërkuar bashkëpunim prej ministrit Lluka, por përveç që nuk është përgjigjur pozitivisht, për më tepër nuk na ka njoftuar zyrtarisht për shumë çështje, të cilat janë të rëndësishme për Bordin dhe kompaninë në tërësi dhe kanë ndikim në vendimmarrjen e drejtë dhe në interes të Telekomit të Kosovës. Deklaratat e ministrit Valdrin Lluka, përveç tjerash po e dëmtojnë afarizmin e kompanisë duke ndikuar në uljen e satisfaksionit të konsumatorëve dhe dyshojmë që këto deklarata mund të jenë të lidhura edhe me procesin e privatizimit, të cilin ministri Valdrin Lluka e ka paralajmëruar”, thekson deklarata e Bordit të Telekomi, duke e akuzuar Valdrin Llukën edhe për mos bashkëpunim.

Por Bordi i kësaj ndërmarrje nuk ka folur për punësimet që janë duke ndodhur në të, shkruan Telegrafi.

Deklaratë e plotë e Bordit të drejtorëve të Telekomit të Kosovës

Pas shqyrtimit të mometumit, në të cilin është targetuar Telekomi i Kosovës dhe me qëllim të realizimit të interesave të ndryshme që mund të jenë evidente, Bordi i Drejtorëve të Telekomit të Kosovës vendos që të bëjë këtë deklaratë për opinionin publik:

Deklaratat politike të ministrit të MZHE, z. Valdrin Lluka, besojmë se janë shumë tendencioze duke pasur parasysh që Telekomi i Kosovës është në periudhën e marrjeve të vendimeve shumë të rëndësishme që mundësojnë afarizm normal të kompanisë në të ardhmen.

Telekomi i Kosovës është në fazën e shqyrtimit të kontratës me Z Mobile, e cila për vite me radhë e ka rënduar funksionimin normal të Telekomit të Kosovës dhe që e ndikon afarizmin financiar negativisht me miliona euro. Momentalisht Telekomi ka emëruar ekipin që është duke negociuar me Z Mobile dhe vazhdimisht jemi duke u përpjekur që të jemi të informuar që në fund të arrihet një marrëveshje që do të jetë e leverdishme për kompaninë.

Jemi në dijeni që edhe çështjet tjera që po diskutohen janë të rëndësishme, por impakti financiar është minor, karshi me problemet reale që i ka Telekomi i Kosovës. Ne në vazhdimësi kemi kërkuar bashkëpunim prej ministrit Lluka, por përveç që nuk është përgjigjur pozitivisht, për më tepër nuk na ka njoftuar zyrtarisht për shumë çështje, të cilat janë të rëndësishme për Bordin dhe kompaninë në tërësi dhe kanë ndikim në vendimmarrjen e drejtë dhe në interes të Telekomit të Kosovës.

Deklaratat e ministrit Valdrin Lluka, përveç tjerash po e dëmtojnë afarizmin e kompanisë duke ndikuar në uljen e satisfaksionit të konsumatorëve dhe dyshojmë që këto deklarata mund të jenë të lidhura edhe me procesin e privatizimit, të cilin ministri Valdrin Lluka e ka paralajmëruar.

Gjithashtu është me rëndësi të ceket që edhe shumë media, të cilat po e targetojnë Telekomin e Kosovës duke e sulmuar publikisht, le të jenë në dijeni që po e ndikojnë negativisht në satisfaksionin e konsumatorit dhe direkt po e dëmtojnë shumë afarizmin e kompanisë. Shpresojmë që edhe sulmi i mediave (jo të gjithave) mos të jetë me qëllime të tjera duke pasur parasysh që shumë nga këto media, në të kaluarën kanë përfituar kontrata shuma milionëshe ndër vite me Telekomin.

Dëmtimi i afarizmit të Telekomit mund t’i shërbejë interesave të subjekteve të ndryshme që mund të kenë pretendime ndaj dhe nga Telekomi, andaj ju lusim që të përmbaheni nga deklarimet e tilla që seriozisht po e dëmtojnë të ardhmen e Telekomit të Kosovës. /Telegrafi/