Blinken sot pasdite pritet të arrijë në Shkup

Sekretari amerikan i shtetit, Antony Blinken, sot pasdite pritet të arrijë në Shkup, ku do të marrë pjesë në Këshillin e 30-të Ministror të Organizatës për Siguri dhe Bashkëpunim në Evropë – OSBE, i cili mbahet nga sot deri më 1 dhjetor, përcjell Telegrafi Maqedoni.

Blinken do ta fillojë pjesëmarrjen në samitin e OSBE-së me një takim me shefin e diplomacisë dhe kryetar të OSBE-së, Bujar Osmani. Ai në Shkup duhet të arrijë nga Brukseli, ku po merr pjesë në takimin ministror të NATO-s, ndërsa pas takimit me Osmanin, Sekretari Amerikan i Shtetit është paraparë të marrë pjesë në një darkë joformale që i paraprin Këshillit Ministror, ​​i cili zyrtarisht fillon nesër. Pas Shkupit, Blinken niset për në Izrael.

Në njoftimin e Departamentit të Shtetit për vizitën e Blinken në Shkup thuhet se ai do të konfirmojë përkushtimin e vendosur të Shteteve të Bashkuara ndaj OSBE-së dhe misionit të saj bazë për promovimin e sigurisë, stabilitetit dhe bashkëpunimit ndërmjet shteteve, me theks të veçantë në të drejtat e njeriut dhe zgjidhjen e mosmarrëveshjeve në mënyrë paqësore. Sekretari Blinken do të theksojë gjithashtu rolin kyç të OSBE-së në promovimin e sigurisë gjithëpërfshirëse në rajon dhe do ta falënderojë Maqedoninë për rolin e saj udhëheqës.

Takimi ministror në Shkup shënon praninë e diplomatëve të parë të Shteteve të Bashkuara dhe Federatës Ruse, Antony Blinken dhe Sergei Lavrov, gjë që e bën atë një nga ngjarjet e rralla ku të dy do të jenë në të njëjtin vend për herë të parë që nga fillimi i pushtimit rus në Ukrainë në shkurt 2022. Për momentin nuk ka asnjë njoftim për një takim mes Blinken dhe Lavrov./Telegrafi/