Blerina Kllokoqi Rugova zgjidhet si kreatorja zyrtare për të dizajnuar uniformat e Ushtrisë së Kosovës

Kreatorja e njohur shqiptare, Blerina Kllokoqi Rugova, është përzgjedhur si dizajnerja që do të krijojë uniformat e reja të Ushtrisë së Kosovës.

Lajmin e ka bërë të ditur vetë ajo përmes një videoje të publikuar në Instagram, ku shprehu entuziazmin dhe krenarinë për këtë arritje të madhe.

Blerina Kllokoqi Rugova, e cila është edhe nusja e presidentit historik të Kosovës, Ibrahim Rugova, është themeluese e markës “Bukur”, një brend i njohur për elegancën dhe identitetin shqiptar në modë. Tashmë, kjo markë do të bëjë histori duke dizajnuar uniformat zyrtare të ushtrisë, një projekt i paprecedentë në rajon.

Në mesazhin e saj, ajo tha: “Të dashur miq, partnerë dhe mbështetës të brendit ‘Bukur’, sot është një ditë e veçantë për ne, pasi festojmë dyvjetorin e një rrugëtimi të mbushur me pasion, kreativitet dhe përkushtim. Gjatë këtyre dy viteve, kemi sfiduar veten për të sjellë dizajne që mishërojnë elegancën, identitetin dhe fuqinë e stilit shqiptar. Por sot kemi edhe një arsye më shumë për të festuar së bashku”.

Ajo theksoi se ky është një nder i madh dhe një arritje historike, duke u bërë dizajnerja e parë në rajon që i besohet një projekt i tillë: “Këto uniforma do të jenë pjesë e rrugëtimit të Kosovës drejt NATO-s, duke na vendosur në një nivel të ri. Kjo është një dëshmi se vizioni dhe përkushtimi sjellin suksese të mëdha. Ju falënderojmë nga zemra për mbështetjen tuaj të vazhdueshme. ‘Bukur’ është e Kosovës”.

View this post on Instagram

A post shared by BUKUR (@bukurworld)

Ky projekt shënon një moment të rëndësishëm jo vetëm për Blerina Kllokoqi Rugovën, por edhe për industrinë e modës shqiptare, e cila po gjen gjithnjë e më shumë hapësirë në projekte të rëndësishme shtetërore dhe ndërkombëtare. /Telegrafi/