Biden zotohet se SHBA do të ‘deklasifikojë’ informacionet në lidhje me origjinën e COVID-19

Joe Biden është zotuar se administrata e tij do të “deklasifikojë” sa më shumë informacion rreth origjinës së COVID-19 të jetë e mundur – duke përfshirë çdo lidhje të mundshme me një laborator kërkimor kinez.

Pasi urdhëroi agjencitë e inteligjencës, përfshirë FBI-në, të hetojnë se nga erdhi virusi në vitin 2021, presidenti amerikan ka nënshkruar tani legjislacionin që kërkon që çdo detaj i zbuluar të bëhet publik, shkruan Sky News, përcjell Telegrafi.

“Ne duhet të arrijmë në përfundim rreth origjinës së COVID-19 për të siguruar që ne mund të parandalojmë më mirë pandemitë e ardhshme”, citohet të ketë thënë ai.

Projektligji i zotit Biden, për të cilin ai tha se do të kufizonte vetëm ndarjen e çdo informacioni që “do të dëmtonte sigurinë kombëtare”, kaloi lehtësisht si në Senat ashtu edhe në Dhomën e Përfaqësuesve.

Kështu, çdo dokument përkatës duhet të publikohet brenda 90 ditëve nga nënshkrimi i projektligjit.

Një hap i tillë vjen pasi drejtori i FBI-së, Christopher Wray zbuloi se agjencia mendonte se virusi “me shumë gjasa” vinte nga një rrjedhje laboratorike kineze.

Ai tha se Pekini – i cili e ka refuzuar vazhdimisht atë vlerësim – “po bënte çmos për të penguar dhe turbulluar” përpjekjet ndërkombëtare për të mësuar më shumë rreth origjinës së pandemisë.

Departamenti Amerikan i Energjisë thuhet gjithashtu se ka vlerësuar “me besim të ulët” se pandemia rezultoi nga një rrjedhje e paqëllimshme laboratorike në Kinë.

COVID-19 u shfaq për herë të parë në qytetin e Wuhan në fund të vitit 2019, përpara se të shpallej një pandemi në fillim të vitit 2020, duke bërë që vendet në mbarë botën të futen në bllokime.

Dhe Biden tha: “Administrata ime do të vazhdojë të shqyrtojë të gjitha informacionet e klasifikuara në lidhje me origjinën e COVID-19, duke përfshirë lidhjet e mundshme me Institutin e Virologjisë Wuhan”.

Pozicioni zyrtar i Organizatës Botërore të Shëndetësisë, sipas një raporti të vitit 2021, është se është “jashtëzakonisht e pamundur” që virusi të ketë ardhur nga laboratori i Wuhan – por nuk e përjashtoi plotësisht një mundësi të tillë.

Sipas tyre, shpjegimi më i mundshëm ishte se virusi kishte origjinën në një lakuriq nate përpara se të kalonte te “një kafshë ndërmjetëse” dhe më pas te njerëzit. /Telegrafi/