Biden shpreson që Irani të tërhiqet nga konflikti me Izraelin për të shmangur një luftë më të gjerë në Lindjen e Mesme

Presidenti i SHBA-së, Joe Biden, ka thënë se shpreson që Irani të tërhiqet nga kërcënimet për hakmarrje kundër Izraelit për të shmangur një luftë serioze në Lindjen e Mesme.

Bëhet e ditur se tensionet po rriten në rajon pasi lideri më i lartë politik i Hamasit, Ismail Haniyeh, u vra në kryeqytetin e Iranit, Teheran.

Irani është zotuar të hakmerret për vdekjen e Haniyeh, me përfaqësuesit e tij që tashmë kanë përshkallëzuar sulmet kundër Izraelit.

Hamasi dhe Irani të dy akuzojnë Izraelin për kryerjen e vrasjes, shkruan skynews, përcjell Telegrafi.

Vrasja e liderit të grupit militant erdhi një ditë pasi ushtria izraelite pretendoi se kishte vrarë një komandant të lartë të grupit militant libanez Hezbollah në Bejrut.

Ndërsa Irani vazhdon të kërcënojë me sulm hakmarrës Izraelin, presidenti amerikan u pyet nëse mendonte se kishte një shans që ata të tërhiqeshin.

Biden tha: “Shpresoj që po. Nuk e di”.

Ndërkohë, Hezbollahu së fundmi gjuajti rreth 50 raketa nga Libani drejt Galilesë së sipërme.

Pamjet e publikuara në rrjete sociale tregonin sistemin e mbrojtjes Iron Dome të Izraelit duke u aktivizuar.

Në një deklaratë që merrte përgjegjësinë për sulmin me raketa, Hezbollah bëri të qartë se nuk ishte në përgjigje të vrasjes së komandantit të tyre të lartë.

Grupi tha se breshëria ishte një përgjigje ndaj sulmeve izraelite që vranë civilë në dy fshatra në jug të Libanit.

Në deklaratën e Hezbollahut thuhej: “Në mbështetje të popullit tonë të palëkundur palestinez në Rripin e Gazës dhe në mbështetje të rezistencës së tyre të guximshme dhe të ndershme dhe në përgjigje të sulmeve të armikut izraelit ndaj fshatrave të palëkundura jugore dhe shtëpive të sigurta, veçanërisht sulmeve që synonin fshatrat Kafr Kila dhe Deir Siryan dhe civilët e plagosur, Rezistenca Islamike përfshiu vendbanimin e ri të Beit Hillel në planin e saj të zjarrit dhe e bombardoi atë për herë të parë me dhjetëra raketa Katyusha”.

Megjithatë, Izraeli ende nuk ka komentuar mbi sulmin.

Ndryshe, përpara se Hezbollahu të lëshonte raketat e tij, një sulm ajror izraelit në një shkollë që strehonte personat e zhvendosur në qytetin e Gazës vrau të paktën 15 persona. /Telegrafi/