Berisha: Së shpejti do të fillojmë me një fushatë për përfshirjen e serbëve në FSK

Ministri i Forcës së Sigurisë së Kosovës (FSK), Rrustem Berisha në punimet e seancës së parë të Konferencës “FSK dhe Partnerët”, e organizuar nga Ministria për Forcën e Sigurisë së Kosovës theksoi se do të fillojnë një fushatë për të përfshirë pjesëtarët e komunitetit serb në FSK pas largimeve të fundit të këtij komuniteti.

Berisha në këtë konferencë tha se po i kushtojnë rëndësi pjesëmarrjes së këtij komuniteti në FSK, pasi janë detyruar që të japin dorëheqjet e tyre.

“Kemi avancim edhe në përfshirjen e gjinisë femërore. Rëndësi i kemi kushtuar komuniteteve në FSK. Jemi ballafaquar me kërkesa të shumta nga komuniteti serb për largimin nga FSK-ja. Ata janë detyruar që të largohen nga FSK-ja. Ne kemi ndërmarr të gjitha masat për zbutjen e kërkesave të tyre. Shumë shpejt do të fillojmë fushatën për të kyçur  këtë komunitet në FSK. Tani jemi në fazën e fillimi të procesit të tranzicionit. Jemi zotuar për tu bërë ofrues rajonal i sigurisë dhe jo konsumues i saj. FSK-ja ka zhvilluar partneritet të fuqishëm me NATO-n dhe KFOR-in”, ka thënë Berisha.

Lexo po ashtu Berisha: Po tentohet dëmtimi i imazhit të FSK-së, mbi 40 pjesëtarë serbë duan të largohen

Sipas tij, FSK-ja dhe më tutje vazhdon të vlerësohet si institucioni më i besueshëm në vend.

“Prania e partnerëve tonë në këtë konferencë e bën FSK-në që të krenohet për punën e përbashkët në paqe e siguri e më gjerë”, tha ndër të tjera ministri Berisha.

Lexo po ashtu Beogradi nuk dëshiron të shohë pjesëtarë serbë në Forcën e Sigurisë së Kosovës

Edhe kryetari i Kuvendit të Kosovës, Kadri Veseli theksoi se në kuvend janë proceduar tri ligjet e nevojshme për FSK-në.

Veseli tha se FSK-ja gjithmonë do të jetë krah i fuqishëm i NATO-s dhe KFOR-it.

“Jemi shumë krenar sot që qëndrojmë këtu para partnerëve me suksesin të cilin e keni realizuar ju. Një sukses i sovranitetit. Është një dëshmi për paqe, tolerancë, bashkëjetese për të treguar që kemi identitet, shtet dhe t’i mbrojmë vlerat tonë perëndimore që të arrijmë përmes këtij partneriteti që të marrim përgjegjësi edhe jashtë kufijve të Kosovës. Falënderoj gjeneralët e NATO-s, KFOR-in etj. Ne në Kuvendin e Kosovë i kemi proceduar tri ligjet e nevojshme dhe do të lëvizim bashkë në partneritet. Do të jemi me ju. FSK-ja do të jetë krah i fuqishëm i juaj. Ju ftoj dhe sot që të na ndihmoni. FSK-ja është nderi dhe krenaria e Kosovës. Janë njerëzit më të sjellshëm. Kjo do të jetë dhe në të ardhme përcaktimi jonë – paqja”, u shpreh Veseli.

Ndryshe, në këtë ceremoni kanë marr pjesë edhe kryeministri i Kosovës Ramush Haradinaj; komandanti i FSK-së gjenerallejtënant, Rrahman Rama, komandanti i KFOR-it  gjeneral major, Salvatori Cuoci, etj. /Telegrafi/