Beqaj: Kosova ka potencial të jetë lidere në rajon për inovacion dhe ndërmarrësi

Kosova ka potencial të jashtëzakonshëm të jetë lidere e rajonit për inovacion dhe ndërmarrësi. Kështu u tha gjatë prezantimit të sfidës ndërkombëtare për financimin e bizneseve fillestare “Hello Tomorroë”

Ministri i Ministrisë së Inovacionit dhe Ndërmarrësisë, Besim Beqaj së bashku me ambasadorin e Francës në Kosovë, Didier Chabert, kanë folur për rëndësinë e pjesëmarrjes së të rinjve të Kosovës në këtë garë.

“Trendët e globalizimit janë të orientuara drejt këtyre temave dhe po lëvizin me hapa të shpejtë. Fatmirësisht edhe rinia kosovare është duke i ndjekur këto trende. Kosova ka potencial të jashtëzakonshëm të jetë lidere e rajonit për inovacion dhe ndërmarrësi. Në këtë aspekt Qeveria e Republikës së Kosovës është e përkushtuar për zhvillim ekonomik, të bazuar në inovaicion, rini, hulumtim dhe zhvillim, ekonomi të dijes, soft skills dhe teknologji të reja”, tha Beqaj.

“‘Hello Tomorrow’ është mundësi ideale për rininë tonë për të përfituar nga rrjeti më i madh i teknologjisë, duke takuar kokë më kokë Venture Capital dhe grupe të mëdha të investitorëve”, shtoi ai.

Ndërsa, ambasadori Chabert theksoi rëndësinë që është duke i dhënë Franca përkrahjes financiare në fushën e inovacionit dhe teknologjisë.

“Kosova ka popullatën më të re dhe më të talentuar në Evropë. Jam entuziast dhe krenar të shoh shumë ndërmarrës nga Kosova të aplikojnë dhe të përzgjidhen në këtë garë”, tha ambasadori Chabert.

“Hello Tomorrow” ka nisur edicionin e pestë të “Global Challenge”, një garë e bizneseve fillestare [start-up] dedikuar ndërmarrësve të shkencës dhe teknologjisë që është e hapur deri më 14 shtator. /Telegrafi/