Bayern merr një fitore rutinore në udhëtim ndaj Mainzit

Bayern Munich ka shënuar fitore me rezultat 3-1 në udhëtim ndaj Mainzit në kuadër të javës së tetë në elitën e futbollit gjerman.

Mysafirët treguan ‘dhëmbët’ që në start të këtij ballafaqimi duke shënuar në minutën e 11-të përmes Kingsley Coman i cili u shërbye mjaft mirë nga gjermani Leroy Sane.

Epërsinë e bavarezëve e dyfishoi prurja e re në ekip, Harry Kane, i cili shënoi në minutën e 16-të me kokë pas asistimit të Leon Goretzkas.

Vendasit nuk qëndruan duarkryq dhe shënuan pak minuta pa përfunduar pjesa e parë duke ngushtuar diferenceën përmes Anthony Caci, i cili me një goditje mjaft të bukur çon topin në cepin e djathtë të rrjetës.

Me epërsinë prej një goli të Bayernit, përfundoi pjesa e parë e takimit.

Bayern ia doli të shënojë edhe një herë tjetër në minutën e 59-të ku përsëri protagonist ishte Leon Goretzka i cili kësaj radhe arrin të shënoi për t’i dhënë qetësinë bavarezëve dhe golin që doli të jetë i fundit në këtë takim.

Pas kësaj fitoreje Bayerni mban pozitën e tretë në Bundesliga me 20 pikë të tubuara, dy më pak se lideri Bayer Leverkusen që mban lidershipin./Telegrafi/