Banka Botërore: Maqedonia do të ketë rritje të ngadalshme ekonomike, inflacioni mund të zgjas me vite të tëra

Banka Botërore në raportin për rritjen e ekonomisë, parasheh rritjen e ekonomisë së Maqedonisë vetëm në 2,7 për qind për këtë vit.

Banka Botërore parashikon rritje të prodhimit të brendshëm bruto të Maqedonisë së Veriut prej 2,7 për qind këtë vit dhe 3,1 për qind në vitin 2023.

BB, në raportin e qershorit për perspektivën ekonomike globale, uli parashikimet e mëparshme ekonomike për vendin, këtë vit me 1,0 për qind dhe për vitin 2023 me 0,3 për qind.

Rritja ekonomike në vitin 2024, sipas parashikimeve të BB-së, do të arrijë në 3.2 për qind.

Nga ana tjetër, parashikimi për rritjen globale për vitin 2022 është ulur me gati një të tretën, në 2.9 për qind.

Arsyet kryesore për këtë janë sulmi rus ndaj Ukrainës dhe dëmet e shkaktuara nga pandemia Covid-19, të cilat kanë kontribuar që shumë vende tani përballen me recesion.

Lufta në Ukrainë ka ngadalësuar ekonominë globale, e cila tani po hyn në një periudhë të rritjes së dobët dhe inflacionit në rritje, me mundësinë e përkeqësimit të mëtejshëm.

Presidenti i Bankës Botërore, David Malpas, ka paralajmëruar se rritja globale mund të bjerë në 2.1 për qind këtë vit dhe në vetëm 1.5 për qind në vitin 2023.

“Sot ekziston një rrezik i lartë i stagflacionit. Rritja e ngadaltë ka të ngjarë të zgjasë një dekadë për shkak të investimeve të dobëta në pjesën më të madhe të botës. Duke pasur parasysh se inflacioni tani është në nivelin më të lartë prej dekadash në shumë vende dhe oferta pritet të rritet ngadalë, ekziston rreziku që inflacioni të mbetet i lartë për një kohë të gjatë”, tha Malpas.

Banka Botërore parashikon që ritmi i rritjes globale midis 2021 dhe 2024 do të ngadalësohet me 2.7 pikë përqindjeje, më shumë se dyfishi i ngadalësimit të parë midis 1976 dhe 1979.

Raporti paralajmëron gjithashtu se rritja e normave të interesit për të vënë nën kontroll inflacionin në fund të viteve 1970 ishte aq e madhe sa shkaktuan një recesion global në 1982 dhe një seri krizash financiare në tregjet dhe ekonomitë në zhvillim.

Ekziston një rrezik real që një shtrëngim i kushteve financiare më shpejt se sa pritej mund të shtyjë disa vende në një krizë borxhi siç ishte në vitet 1980, paralajmëron Banka Botërore.