Ballkani e mbyll fazën e grupeve me humbje ndaj Cluj në edicionin historik në Ligën e Konferencës

Ballkani e ka mbyllur ndeshjen e fundit të fazës së grupeve ndaj Cluj me humbje (1-0), ku ekipi rumun me këtë fitore, ka kaluar tutje.

Cluj e nisi ndeshjen më mirë duke radhitur disa raste para portës së Ballkanit.

Emmanuel Yeboah rrezikoi i pari, ndërsa pas tij Karlo Muhar, por për fatin e Ballkanit nuk ishin të saktë.

Ndeshja u zhbllokua në minutën e 17-të, kur Nana Boateng, shënoi për 1-0.

Në minutën e 32-të, Cluj fitoi penallti, por Ciprian Deac u ndal nga Stivi Frashëri priti penalltinë e tij.

Penaltia u përsërit dhe sërish Deac ishte përballë Frashërit, por portieri ynë sërish priti gjuajtjen e tij.

Ballkani vetëm një herë gjuajti në portë në pjesën e parë.

Në pjesën e dytë të besuarit e Ilir Dajës ishin më të mirë dhe rastin më të mirë e kishin të parët.

Në minutën e 53-të, një harkim në zonë i Armend Thaqit gjeti kokën e Albion Rrahmanit, i cili gjuajti mbi portë.

Stivi Frashëri eviton një tjetër gol në minutën e 60-të, kur Andrei Burca gjuan bukur me kokë, por përgjigjet në të njëjtën mënyrë “gardiani” i Ballkanit.

Edvin Kuç kontrolloi një pasim brenda zonës dhe gjuajti bukur, por portieri Simone Scuffet ishte në vend (71’).

Pas katër minutash provoi edhe Meriton Korenica, por sërish portieri ishte në vend.

Deri në fund Ballkani e dominoi ndeshjen me mbajtjen e topit, por nuk krijoi më raste të mira, duke u pajtuar në fund me humbjen.

Ballkani e mbyll fazën e grupeve me një fitore, një barazim dhe katër humbje: gjithsej katër pikë. /Telegrafi/