Bahtiri i bashkohet për kafe kandidatëve për Mitrovicën

Kryetari i Mitrovicës, Agim Bahtiri i është përgjigjur pozitivisht ftesës për kafe nga kandidati i Lidhjes Demokratike të Kosovës, Armend Agolli, por ky i fundit nuk ishte aty kur Bahtiri arriti.

Më parë Telegrafi kishte raportuar se edhe kandidati i Partisë Demokratike të Kosovës, Bedri Hamza për kryetar të Mitrovicës së Jugut dhe kandidati i Iniciativës Qytetare, Erden Artiq për kryetar të Mitrovicës së Veriut janë takuar sot në orët e mëngjesit për një kafe pune.

Ajo çka vërehet në fotografinë ku shihet Bahtiri është se në tavolinë më nuk është kandidati i PDK-së për kryetar të Mitrovicës, Bedri Hamza, e as ai i LDK-së, Armend Agolli.

Agolli një ditë më parë u kishte bërë thirrje Hamzës dhe Agimit Bahtirit për një kafe pune, por Bahtiri nuk i është përgjigjur ftesës.

Lexo po ashtu Kandidati i LDK-së për kryetar të Mitrovicës i ftoi në kafe, thirrjes iu përgjigjen disa nga kandidatët

Në takimin e sotëm të pranishëm ishin Agolli, Hamza dhe Artiq, teksa më vonë Hamza u largua e Bahtiri iu bashkua takimit.

“Përshëndetje z.Hamza dhe z. Bahtiri, Ju bëj ftesë publike për kafe, që do ta pijmë bashkë nesër në orën 9:00, në veri të Mitrovicës, tek kafeneja e Izet Boletinit. Pjesë e takimit do të jetë edhe Iniciativa Qytetare, pjesë e së cilës janë përfaqësuesit të gjitha komuniteteve që jetojnë në Mitrovicë. Shpresoj në ardhjen tuaj dhe ju mirëpres në takim”, kishte shkruar Agolli të martën në Facebook.

Ndryshe, zgjedhjet lokale do të mbahen më 17 tetor. Shumica e partive politike kanë deklaruar se do të mbajnë fushatë zgjedhore vetëm pesë ditë për shkak të pandemisë COVID-19. /Telegrafi/