Avokati serb që vizitoi varrezat e Jasharëve: Është në interes të Serbisë që të njohë Pavarësinë e Kosovës

Avokati serb, Çedomir Stojkoviq,  ka thënë se personalisht e njeh pavarësinë e Kosovës, dhe se sipas tij një gjë të tillë duhet ta bëjë edhe shteti i tij Serbia.

Duke folur për vizitën në Prekaz, ai ka thënë se ka me mijëra fjalë për të thënë në varrin e një fëmije.

Ai në RTV Dukagjini ka thënë se duhet të shikojmë për të ardhmen.

“Kur Sanduloviq pranoi Pavarësinë e Kosovës unë isha i pari që përshëndeta këtë vendim. Është në interes të Serbisë që të njoh Pavarësinë e Kosovës. Serbia duhet t’i ndihmoj fqinjit të vet Kosovës për t’u bërë anëtare e OKB-së pasi është në interes që fqinji të bëhet i mirë”, ka deklaruar ai.

Lexo po ashtu Avokati serb Stojkoviq: Sanduloviq më ka thënë se e kanë rrahur serbë të Kosovës, indikacionet shkojnë te Radoiçiq

Avokati serb, Çedomir Stojkoviq, vendosi lule mbi varrin e Blerina Jasharit në kompleksin memorial “Adem Jashari” në Prekaz. Ai tha se askush “nuk do të na pengojë të ecim në rrugën e pajtimit, paqes, solidaritetit dhe drejtësisë”.

Blerina ishte 7-vjeçare kur u vra nga forcat serbe në vitin 1998.

Bashkë me Blerinën, nga forcat serbe u vranë edhe më shumë se 50 anëtarë të tjerë të familjes Jashari, në mesin e tyre edhe komandanti legjendar i UÇK-së, Adem Jashari

Stojkoviq, shtetas i Serbisë, është avokat i politikanit opozitar në Serbi, Nikolla Sandulloviq, i cili u arrestua më 3 janar 2024, pak kohë pasi publikoi fotografi nga kompleksi memorial në Prekaz.

Ai u arrestua nën dyshimet “se ka kryer vepër penale të nxitjes së urrejtjes dhe mosdurimit kombëtar, racor dhe fetar”. Ndërkohë ai u lirua, por iu konfiskua pasaporta./Telegrafi/