Arrestohen personat e një grupi të organizuar, të dyshuar për vjedhje të mëdha të njëpasnjëshme

Policia e Kosovës, në realizimin e detyrave dhe përgjegjësive ligjore në funksion të mbajtjes së rendit publik dhe garantimit të sigurisë së përgjithshme në vend, në vazhdimësi po punon me intensitet dhe kapacitete profesionale për arritjen e objektivave ligjore.

Në procesin e hetimeve lidhur me rastet e disa vjedhjeve të rënda dhe vjedhjeve të veturave, Policia e Kosovës ka arrestuar tre persona, teksa njëri nga ta është në arrati.

Bazuar në hetime policore, fjala është për grup të përbërë nga katër persona, por që numri i tyre mund të jetë edhe më i madh. Grupi është vëzhguar dhe monitoruar nga Policia që nga muaji tetor.

Të dyshuarit kane qenë të organizuar mirë dhe kanë kryer aktivitetet kriminale, filluar nga vjedhja e veturave – të cilat i kanë shfrytëzuar për të kryer vjedhje të tjera – dhe vjedhja e targave të veturave për t’ua vënë veturave të vjedhura e për të kryer me to veprat e vjedhjeve të shtëpive dhe veturave tjera. Personat e dyshuar veprimet i kanë kryer të maskuar, kanë pas dorëza dhe gjithashtu ishin të armatosur.

Ky grup dyshohet të ketë kryer vjedhje të rënda në lagjen Veternik dhe në fshatin Çagllavicë, kryesisht nëpër shtëpi ku ishin të parkuara veturat e shtrenjta. Të njëjtit vjedhjet i kanë kryer pas mesnate – derisa banoret e shtëpisë kanë qenë duke fjetur – me ç’rast kanë vjedhur gjësende me vlerë, çelësat e veturave e edhe veturat.