Arrestohen dy persona të dyshuar për therjen e 19-vjeçarit në Drenas

Policia e Kosovës ka arrestuar dy persona të dyshuar për therjen me thikë të një 19-vjeçari, ngjarje e cila ndodhi tri ditë më parë, në afërsi të stacionit të autobusëve në Drenas.

Detajet për rastin i ka bërë të ditura për Telegrafin, zëdhënësja e Policisë së Kosovës për rajonin e Prishtinës, Flora Ahmeti.

Ajo tha se të arrestuarit, janë një 26-vjeçar dhe një 18-vjeçar, që të dy shtetas të Kosovës, të cilët tashmë janë dërguar në mbajtje.

“Drejtoria Rajonale e Policisë në Prishtinë, respektivisht njësiti për Hetime të Përgjithshme, sot ka arrestuar dy persona të dyshuar për rastin tentim vrasje që ka ndodhë javën e kaluar në Drenas.  Personat e dyshuar: H. Sh, mashkull, 26 vjeç, shtetas i Republikës së Kosovës dhe A.B, mashkull, 18 vjeç, shtetas i Republikës së Kosovës  Pas intervistimit,  me aktvendim të prokurorit të shtetit janë dërguar në qendrën e mbajtjes”, bëri të ditur Ahmeti.

Lexo po ashtu Theret një 19-vjeçar në Drenas, policia në kërkim të dy të dyshuarve

Ndryshe, një i ri, 19-vjeçar është therur në afërsi të stacionit të autobusëve, mesditën e së premtes në Drenas.

Lajmin për Telegrafin e ka konfirmuar zëdhënësja e Policisë së Kosovës, Flora Ahmeti.

Ajo kishte thënë se policia është në kërkim të dy të dyshuarve në lidhje me rastin.

“Rreth orës 13:00 kemi pranuar informatën për një rrahje në progres në afërsi të stacionit të autobusëve në  Drenas. Me të marrë informatën njësitet e stacionit policor kanë dalë në vendin  e ngjarjes dhe po merren me rastin. Bazuar në  informacionet e para dyshohet se një person mashkull 19 vjeç, ka marrë plagë nga një mjet i mprehtë dhe i njëjti është dërguar në QKUK për trajtim mjekësor. Lidhur me këtë rast policia ka identifikuar dy persona të dyshuar dhe është në kërkim të tyre”, tha Ahmeti. /Telegrafi/