Arijanet Muriqi, portieri i talentuar shqiptar që u grumbullua në bankën rezervë të Manchester Cityt

Kampioni në fuqi i Anglisë, Manchester City nuk ka arritur më shumë se një barazim 1-1 në udhëtim tek Wolverhampton.

Skuadra e Pep Guardiolas hasi në vështirësi në këtë takim, pasi edhe fati ia ktheu shpinën kur goditi dy herë shtyllën me anë të Kun Agueros.

E veçantë e kësaj sfide ishte se trajneri Pep Guardiola kishte grumbulluar një futbollist shqiptar në mesin e 18 futbollistëve.

Fjala është për portierin Arijanet Muriqi, shqiptar nga Mali i Zi.

19-vjeçari u grumbullua si portier rezervë pas lëndimit të portierit të dytë të Cityt, Claudio Bravo.

Në fakt City e kishte huazuar portierin tek NAC Breda në Holandë, por vetëm një muaj qëndroi Muriqi atje për tu rikthyer në Angli.

Pep Guardiola dha urdhër që portieri të rikthehet në klub pas huazimit pasi kishte nevojë urgjente për të.

Muriqi iu bashkua Cityt në vitin 2016 nga gjiganti zviceran Grasshopper dhe deri më tani ka mbrojtur për grupmoshat U18 dhe U23.

Në Nac Breda, portieri i talentuar shqiptar ka mbrojtur vetëm një ndeshje atë të fituar 3-0 ndaj De Graafschap.

I gjatë 1,98 centimetra, Muriqi aktualisht është pjesë e Kombëtares së Malit të Zi për U21.

Shpresojmë që Përfaqësuesja e Kosovës të bind lojtarin që ta vesh fanellën verdh e kaltër. /Telegrafi/