Arabia Saudite planifikon të ndërtojë një qytet të ri që do të "qeveriset" nga perëndimorët e jo nga vendorët që aplikojnë ligjet e Islamit, shkruan Daily Mail.
E gjitha po bëhet për t'i lehtësuar nikoqirit të organizojë ngjarjet e ndryshme sportive, që do të mblidhnin adhurues të flaktë të sporteve të ndryshme që do të vinin kryesisht nga vendet perëndimore, transmeton Telegrafi.
Sportsmail ka mësuar se elementi kyç i mbretërisë saudite është "Vizioni 2030" që ka për qëllim prezantimin e ligjeve perëndimore në qytetin e ri të Neomit, projekt ky që pritet të kushtojë hiq më pak se 400 miliardë funte dhe do të shtrihet përgjatë pjesës veriperëndimore të Detit të Kuq.
Kjo do të ndihmonte që sa më shumë ngjarje globale sportive të organizohen në këtë qytet, siç është meçi i së shtunës në Riad mes Anthony Joshua dhe Andy Ruiz, organizimi i të cilit ka kushtuar 66 milionë funte.
E duket se këtë e ka kuptuar mirë qeveria saudite që ka rekrutuar një grup ekspertësh nga e mbarë bota, për të realizuar projektin të cilin e ka prezantuar princi i kurorës Mohammed Bin Salman.
Qyteti i ri do të operojë në mënyrë të pavarur nga pjesa tjetër e vendit, ku do të ketë ligje tjera për punonjësit dhe do të ketë të drejta shtesë për femra si dhe vizitorët e shumtë do të kenë liri të konsumojnë alkool, e jo siç u është mohuar fansave në meçin e shumëpërfolur të boksit. /Telegrafi/
