Apple teston ekranet 65” OLED për iTV?

Një publikim i ri në Korea Herald sugjeron se Apple është duke u përgatitur për krijimin e një modeli të televizorit HDTV, të cilin do ta prodhojë vet ose në partneritet me ndonjë prodhues të njohur botëror.

Gazeta koreane e citon një analist të IBK Securities, i cili ka thënë se Apple ka kërkuar modele të ekraneve OLED me diagonalen prej 65 inç për qëllime testimi.

Megjithatë, gazeta dyshon se raporti mund të jetë spekulativ duke e ditur madhësinë e ekranit dhe koston e lartë të panelëve në teknologjinë OLED.

Burimi i lajmit thotë se Apple do ta lansojë modelin e saj të televizorit iTV në gjysmën e dytë të vitit, pasi që tashmë ka porositur 2 milionë njësi të ekraneve me 65 dhe 77 inç.

Kompanitë e njohura koreane të ekraneve LCD përfshijnë emrat e mëdhenj të industrisë si Samsung, LG, Hansol, S-LCD dhe Boe Hydis (ish Hyundai Display).

Megjithatë, thashethemet për televizorin e HDTV-së kanë qarkulluar në media që nga viti 2011, kur Steve Jobs e më pas edhe Timk Cook ishin deklaruar se televizorët janë një segment me interes për kompaninë Apple, dhe se kjo e fundit mund ta përmirësojë shumë televizorin si pajisje.

Së fundmi, Apple është fokusuar në zgjerimin dhe përmirësimin e resiverit të saj Apple TV, i cili brenda viteve është shndërruar në një pajisje me shumë interes për blerësit, por edhe një gjeneruese e të hyrave të rëndësishme për Apple, krahas pajisjeve mobile sikurse iPhone dhe iPad. / Telegrafi /