Apple me iMac dhe MacBook Air më të lirë gjatë vitit

Linja e kompjuterëve iMac të Apple është shumë e famshme, e fuqishme dhe me dizajn unik, mirëpo përveç karakteristikave atraktive këta kompjuter njihen edhe për çmimin e shtrenjtë të cilin e paguajnë përdoruesit.

Ndërsa linja tjetër e laptopëve MacBook Air njihet për hollësinë, dizajnin dhe fuqinë por në të mungon rezolucioni i formatit ultra-high resolution, e cila është në familjen e MacBook Pro.

Mirëpo, sipas një raporti tejet të besueshëm thuhet se gjatë vitit 2014, Apple tashmë është duke menduar t’i përmirësojë këto mangësi tek pajisjet e saj.

Sipas raportit të KGI Securities thuhet se Apple është duke planifikuar të lansojë modelin me 12 inç të MacBook Air me ekranin Retina, i cili do të jetë edhe më i hollë dhe me trackpad, pa butona fizik.

Raporti thotë se modelet e reja të iMac do të lansohen në gjysmën e dytë të këtij viti, ndërsa MacBook Air do të debutojë në tremujorin e tretë të vitit 2014.

Për më shumë, KGI Securities thotë se modelet e reja të kompjuterëve të Apple do të jenë më të lira, dhe kjo do të jetë përpjekja e kompanisë Apple të marrë një pjesë të tregut nga HP dhe Lenovo, dhe modelet e kompjuterëve të tyre të njohur si all-in-one. / Telegrafi /