Një person nga Shkupi gjendet i vdekur në Liqenin e Dibrës
08/09/2025
Një burrë 46-vjeçar, M.I. nga Shkupi, u mbyt sot pasdite në Liqenin e Dibrës, në afërsi të Komunës Qendra Zhupë. Lajmi u raportua në ora 16:05, kur trupi pa jetë u gjet pranë fshatit Papradnik, përcjell "TV21".
Policia dhe prokurori publik kryen inspektim në vendngjarje, ndërsa trupi i tij u dërgua për autopsi për të përcaktuar shkakun e vdekjes.
Sipas njoftimeve nga Spitali i Përgjithshëm, nuk kishte shenja dhune mbi trup.
Raportohet se viktima ishte një peshkatar, i cili vizitonte shpesh liqenin dhe posedonte leje për peshkim. Ky është rasti i dytë i mbytjes në Liqenin e Dibrës këtë vit, pas një ngjarjeje tragjike në fund të qershorit kur një grua 27-vjeçare humbi jetën pranë plazhit të qytetit.