AmCham dhe USAID me diskutim virtual mbi legalizimin e ndërtimeve pa leje

Oda Ekonomike Amerikane në Kosovë (AmCham), me mbështetje nga USAID/Programi i Qeverisjes Ekonomike në Kosovë, po organizon një diskutim virtual mbi legalizimin e ndërtimeve pa leje në Kosovë, me përfaqësues nga Ministria e Ekonomisë dhe Ambientit, Komuna e Prishtinës, Komuna e Graçanicës, Agjencia Kadastrale e Kosovës dhe përfaqësuesi nga sektori privat.

Pasi të legalizohen dhe regjistrohen në kadastër, ndërtimet pa leje hyjnë në qarkullim zyrtar ekonomik dhe mund të shfrytëzohen për të lehtësuar qasjen në financa dhe rritjen ekonomike.

Objektiv i këtij paneli është të informohen qytetarët, sektori privat, OJQ-të, mediat dhe palët e tjera të interesuara në lidhje me progresin e deritanishëm rreth legalizimit, të ndahen mësimet e nxjerra dhe të nxirren në pah përfitimet e legalizimit duke përdorur të dhëna objektive dhe rezultate të performancës.

Diskutimi virtual është planifikuar për të martën, më 16 mars 2021, duke filluar nga ora 10:00.

Diskutimi virtual pritet të zgjasë për një maksimum prej dy orësh dhe mund të ndiqet përmes transmetimit të drejtpërdrejtë në faqen e AmCham në Facebook, në faqet në Facebook të agjencive të lajmeve Telegrafi.com dhe Ekonomia Online, në faqen në Facebook Legalizo Ndërtimin dhe në faqet në Facebook të komunës së Prishtinës dhe komunës së Graçanicës.

Kemi kënaqësinë t’ju ftojmë ta ndiqni këtë diskutim virtual drejtpërdrejt dhe të mësoni më shumë rreth legalizimit të ndërtimeve pa leje dhe ndikimit pozitiv të tij në zhvillimin ekonomik të Kosovës.