Ambasadori gjerman vizitoi Shtëpinë Muze në Poklek, aty ku forcat serbe masakruan 53 civilë

Ambasadori gjerman në Prishtinë, Jorn Rohde ka vizituar të enjten Shtëpinë Muze në Poklek, aty ku forcat serbe kanë masakruar 53 civilë.

Lidhur me vizitën e tij në Poklek, ka shkruar Fadil Muqolli, të cilit më 17.04.1999, forcat serbe ia vranë 14 anëtarë të familjes së ngushtë, babanë, nënën, katër motrat, bashkëshorten me katër fëmijë, dhe bashkëshorten e vëllait me dy vajza.

Lexo po ashtu Shtëpia në Poklek ku forcat serbe masakruan 53 civilë po bëhet muze

“Sot në Poklek, tek Shtëpia Muze, prita në vizitë Ambasadorin gjerman Jörn Rohde, i shoqëruar nga Xhavit, Arbeni dhe Arbëri nga Drenasi.

Vizita e tyre shërben si një dëshmi për rëndësinë e vazhdueshme të ruajtjes së të kaluarës sonë të trishtë”, shkruan ai.

Më tej Muqolli thotë se për ambasadorin gjerman ishte hera e parë që viziton Poklekun, dhe shprehu hapur trishtimin e tij lidhur me atë çfarë kishte ndodhur në Poklek më 17 prill 1999.

“Në anën tjetër, ne si familjar, të detyruar ta pranojmë këtë fakt, shprehem trishtimin dhe dëshpërimin tonë për mos ndjekjen e kryerësve të këtij krimi nga organet përkatëse”, shkruan ai. /Telegrafi/