Alexei Navalny akuzon Kremlinin për vjedhje të zgjedhjeve për Dumën ruse

Udhëheqësi i burgosur i opozitës në Rusi, Aleksei Navalny ka njoftuar se Kremlini ka përdorur frikësimin dhe shtypjen për të vjedhur zgjedhjet për Dumën në Rusi.

Aktualisht, rezultatet tregojnë se fituese është partia “Rusia e Bashkuar”, që udhëhiqet nga presidenti Vladimir Putin.

“Një rezultat i rremë po shfaqet në tabelën e rezultateve. Vëzhguesit tanë u tërhoqën nga qendrat e votimit. Frikësimi dhe shtypja kanë lënë shumë njerëz pa vullnet. Njerëzit, thjesht, kanë frikë të dalin në rrugë”, njofton Navalny përmes një shkrimi në Instagram.

View this post on Instagram

A post shared by Алексей Навальный (@navalny)

Ai është duke vuajtur një dënim prej dy vjetësh e gjysmë me burgim, nën akuza që aleatët e tij i shohin si të motivuara politikisht.

Rusia ka mbajtur zgjedhjet parlamentare nga data 17 deri më 19 shtator. Në zgjedhje ka munguar një prani e konsiderueshme e opozitës, pasi autoritetet i kanë shpallur “ekstremiste” dhe “agjentë të huaj: organizatat e lidhura me Navalnyn, duke i ndaluar garën secilit nga rrjeti i tij.

Lexo po ashtu Partia e Vladimir Putinit pëson rënie të popullaritetit në Rusi – opozita i cilëson zgjedhjet si mashtrim

Golos një mbikëqyrës i pavarur i zgjedhjeve, tha se kishte regjistruar shumë shkelje gjatë votimit, përfshirë kërcënimet kundër vëzhguesve dhe fletëve të shumëfishta votimi, shembuj të qartë të të cilave qarkulluan në mediet sociale, ku disa individë u kapën nga kamera duke futur pako të fletëvotimeve në kutitë e votimit. /Telegrafi/