Albin Kurti takon Enver Petrovcin: Pata kënaqësinë ta vizitoj pas qëndrimit të tij në spitalet e Prishtinës e Stambollit për shërim

Kryeministri i Kosovës, Albin Kurti, ka takuar aktorin e madh shqiptar, Enver Petrovci, pas disa problemeve shëndetësore që ka pasur së fundmi.

Lajmin e ka bërë të ditur vetë kryeministri përmes publikimit të disa fotografive në Instagram, ku shihet teksa e ka vizituar aktorin e mirënjohur në prani të familjarëve të tij.

Në postimin e tij, Kurti ka ndarë emocionet dhe respektin që ndjen për Petrovci dhe kontributin e tij të madh në kulturën shqiptare.

“Gjallëria dhe kthjelltësia e Enver Petrovcit përcëllon pozitivisht dhe frymon një lloj të lirisë së shprehjes plot karizëm të pasforcuar dhe humor të mençur. Dje pata kënaqësinë të vizitoj aktorin e mirënjohur, pas një qëndrimi të tij në spitalet e Prishtinës dhe Stambollit për shërim. Më priti së bashku me bashkëshorten e tij, Profesoreshën e njohur të Pianos, Valbona Pula Petrovci, si dhe me fëmijët dhe nipërit e mbesat e tyre. Diskutuam gjerë e gjatë për teatrin e filmin tek ne, kontributin dhe sukseset e tij ndër vite, si dhe sfidat që ka hasur përgjatë karrierës së tij të pasur”, shkroi Kurti në Instagram.

“Enver Petrovci, i lindur më 28 shkurt 1954 në Prishtinë, është aktor, shkrimtar dhe regjisor shqiptar. Ai ka interpretuar role të mëdha si Hamlet, Macbeth dhe Julius Cesar duke u bërë një ikonë në kulturën tonë. Enveri është gjithashtu themelues i Teatrit Dodona, Akademisë së Arteve, profesor shumëvjeçar i aktrimit në Fakultetin e Arteve dhe themelues i Teatrit të Babës në Prishtinë. I uroj Enverit dhe familjes së tij shëndet të mirë dhe vazhdimësi në sukseset artistike”, theksoi më tej kryeministri.

Enver Petrovci është një nga figurat më të shquara të kulturës shqiptare, me një karrierë të gjatë dhe të pasur në teatër, film dhe mësimdhënie.

Gjatë vizitës, Kurti dhe Petrovci diskutuan gjerë e gjatë për teatrin dhe filmin në Kosovë, kontributin dhe sukseset e tij ndër vite, si dhe sfidat me të cilat është përballur gjatë karrierës së tij. /Telegrafi/

View this post on Instagram

A post shared by Albin Kurti (@albinkurti_)