Akuzat e LDK-së dhe hetimet e prokurorisë për punësimet në KEK, Haxhiu: VV s’do të ndikojë kurrë në procese punësimi

Ministrja e Drejtësisë, Albulena Haxhiu, ka mirëpritur fillimin e hetimeve nga Prokuroria Themelore në Prishtinë mbi punësimet e reja në një konkurs të KEK-ut, duke thënë se çdo pretendim për parregullsi të mundshme duhet të merr epilogun nga drejtësia.

LDK-ja sot akuzoi partinë në pushtet Lëvizjen Vetëvendosje për punësim në baza partiake në KEK, pas së cilës Prokuroria njoftoi për nisjen e hetimeve.

Haxhiu tha se akuzat e tilla kanë më tepër për qëllim ta dëmtojnë Vetëvendosjen sesa që diçka e tillë qëndron.

“Vetëvendosje nuk ka ndikuar dhe nuk do të ndikojë asnjëherë në procese të tilla. Vetëm personat që e meritojnë t’i marrin ato pozita do t’i marrin. Asnjëherë kriter për punësime s’do të merret anëtarësia partiake. Të gjithë qytetarët e Kosovës duhet të trajtohen të barabartë“, tha Haxhiu për RTK.

Lexo po ashtu Abdixhiku paralajmëron kallëzim penal për punësimet në KEK: Kapje e nepotizëm masiv i çdo vendi e çdo ndërmarrje pa dallim

Kryetari i LDK-së, Lumir Abdixhiku përmes një shënimi në Facebook, ka akuzuar sot partinë që drejton me Qeverinë se kishte paracaktuar personat që do të punësoheshin nga konkursi publik.

“Plot 4668 qytetarë tanë kanë aplikuar për 128 vende pune në Korporatën Energjetike të Kosovës – pra në KEK. Ky aplikim i tyre nuk kishte fare rëndësi, sepse vendet e punës ishin të parandara për 40 familjarë e 80 militantë partiak të partisë në pushtet”, ka shkruar Abdixhiku, përcjell Telegrafi.

Ndërsa, Prokuroria Themelore në Prishtinë njoftoi sot se Departamenti i Krimeve të Rënda – Njësiti për Krime Ekonomike dhe Korrupsion, ka iniciuar hetime lidhur me punësimet në KEK, pas akuzave për punësime në baza familjare e partiake.

Lexo po ashtu Prokuroria nis hetimet lidhur me konkursin për punësime në KEK

“Pokuroria Themelore në Prishtinë, njofton opinionin publik se Departamenti i Krimeve të Rënda, konkretisht Njësiti për Krime Ekonomike dhe Korrupsion, pas raportimeve të publikuara në disa portale lidhur me pretendimet se janë kryer shkelje të rënda ligjore në procesin e rekrutimit të qindra personave në një konkurs të Korporatës Energjetike të Kosovës (KEK), më 04.04.2022, ka iniciuar hetime, ashtu që do të ndërmerren të gjitha veprimet e nevojshme hetimore, me qëllim të sqarimit të plotë të këtyre pretendimeve, konform dispozitave ligjore në fuqi”, thuhet në komunikatë, transmeton Telegrafi.​

Kryeministri Albin Kurti ka mohuar akuzat se në Korporatën Energjetike të Kosovës janë punësuar militantë të Vetëvendosjes. /Telegrafi/