Aksident në rrugën Ferizaj-Gjilan, një i vdekur dhe dy të lënduar

Në fshatin Kllokot, në rrugën magjistrale Ferizaj – Gjilan ka ndodhur një aksident me fatalitet. Aksidenti, nga i cili mbeti një person i vdekur edhe dy të lënduar, ka ndodhur rreth orës 13:00.

Lajmin e ka konfirmuar edhe zëdhënësi i policisë së Gjilanit, Ismet Hashani.

“Nga hetimet e para mësohet se deri tek aksidenti të ketë ardhur kur vetura ‘Golf’ me tabela 06 duke mos u përshtatur shpejtësisë dhe kushteve të rrugës godet nga mbrapa veturën ‘Mercedes’.  Si pasoj e goditjes vozitësi i veturës ‘Golf’ shqiptar shtetas i Kosovës (1928) pëson lëndime të rënda dhe me urgjencë është dërguar në ambulancën e fshatit Pozhoran, ku mjeku kujdestar vetëm se ka konstatuar vdekjen e viktimës, besohet si pasojë e plagëve të pësuara në aksident”, tha Hashani për Klan Kosova.

“Edhe dy persona të tjerë, që të dy shqiptar janë lënduar në këtë aksident dhe janë dërguar në Spitalin Rajonal të Gjilanit, ku gjendja e tyre shëndetësore raportohet të jetë stabile”, tha Hashani.

Policia po i vazhdon hetimet rreth këtij rasti.