Aeroplani që po fluturonte nga Serbia dhe u rrëzua në Greqi bartte 11.5 ton municione – ministri serb jep detajet

Zëvendëskryeministri dhe ministri i Mbrojtjes i Serbisë, Nebojsha Stefanoviq, ka mbajtur një konferencë të jashtëzakonshme për shtyp në lidhje me rrëzimin e aeroplanit ukrainas që po fluturonte nga Serbia në Jordani dhe u rrëzua në Greqi.

Sipas mediave të huaja, përcjell Telegrafi, Stefanoviq ka konfirmuar se aeroplani është nisur nga aeroporti i Nishit të shtunën në orën 20:40 dhe se po bartte municione të kompanisë serbe Valir për Ministrinë e Mbrojtjes së Bangladeshit.

Lexo po ashtu Momenti dramatik kur aeroplani që mbante 'eksploziv' dhe po udhëtonte nga Serbia për në Jordani përfshihet nga flakët – dhe rrëzohet në Greqi

“Ishte një Antonov 12 në pronësi të kompanisë ukrainase Meridian. Fatkeqësisht, sipas informacioneve që kemi në dispozicion, të 8 anëtarët e ekuipazhit kanë humbur jetën”, citohet të ketë thënë Stefanoviq.

Ai ka shtuar se të vdekurit nuk janë shtetas të Serbisë.

Në këtë drejtim, ai ka bërë të ditur se aeroplani po transportonte rreth 11.5 ton produkte të industrisë serbe të dedikuar te klienti përfundimtar në Bangladesh.

Lexo po ashtu Një aeroplan që po fluturonte nga Serbia në Jordani rrëzohet në Greqi – mediat serbe thonë se ishte i mbushur me municione dhe eksploziv

“Pra, klienti i fundit është Ministria e Mbrojtjes e Bangladeshit. Pronar i mallit është kompania private Valir nga Serbia”, ka bërë të ditur ai.

Sipas Stefanoviq, informacioni se aeroplani u nis për në Ukrainë ishte “i pasaktë dhe keqdashës”.

Kompania ukrainase, thotë ai, është vetëm pronare e aeroplanit, kurse malli i transportuar është i kompanisë serbe Valir. /Telegrafi/