Adriana Matoshi shkëlqeu me dukjen gjatë prezantimit të Festivalit të Këngës në RTSh

Në një atmosferë të mbushur me muzikë dhe emocione, mbrëmjen e së martës u mbajt nata e parë e Festivalit të Këngës në Radio Televizionin Shqiptar.

Pallati i Kongreseve, i cili është kthyer në një simbol të kulturës muzikore, u shndërrua në qendrën e vëmendjes ku artistë të shumtë u ngjitën në skenën e tij për të interpretuar live me orkestrën e RTSh-së.

Këtë vit, një nga yjet që ka ndritur në rolin e prezantueses ishte Adriana Matoshi, aktorja dhe deputetja e njohur nga Kosova. Ajo bëri një paraqitje të shkëlqyer gjatë mbrëmjes së parë të festivalit, të veshur me një fustan vjollcë të gjatë, të zbukuruar me pupla dhe me elemente transparente që i shtonin një prekje të veçantë elegancës së saj.

Prezantimi i Festivalit u bë në bashkëpunim mes tri moderatorëve të talentuar: aktorja dhe deputetja Adriana Matoshi, balerini Kledi Kadiu dhe gazetarja e njohur Krisi Çaushi. Treshja ndau me publikun momente të veçanta, duke e bërë këtë natë një ngjarje të pakrahasueshme në botën e muzikës shqiptare.

Lexo po ashtu Nata e parë e Festivalit të 62-të të Këngës në RTSh përfundon me një sërë emocionesh, muzikë të përzgjedhur dhe batuta

Ky edicion i gjatë i Festivalit të Këngës pritet të sjellë emocione dhe talent të padiskutueshëm nga artistët pjesëmarrës, të cilët, nën tingujt e orkestrës live, do të përpiqen të rrëmbejnë zemrat e shikuesve dhe të nderojnë skenën me performancat e tyre.

Mbrëmja e parë ka vënë ritmin për ditët në vijim të festivalit, dhe të gjithë janë në pritje të netëve të tjera të mbushura me muzikë dhe interpretimin unik që vetëm “Festivali i Këngës” mund të ofrojë.

Mbrëmja finale do të zhvillohet të premten, ku fituesi i festivalit, do të jetë përfaqësuesi i Shqipërisë në ‘Eurovision 2024’. /Telegrafi/