Abrashi merr pjesë në Konferencën Globale ‘She Decides’

Me ftesë të katër ministrave për Zhvillim dhe Bashkëpunim Ndërkombëtar – të Belgjikës, Suedisë, Holandës dhe Danimarkës – ministri i Punës dhe Mirëqenies Sociale, Arban Abrashi, po merr pjesë në nismën “She Decides”.

Në kuadër të Konferencës, Abrashi ka bashkëbiseduar me homologë të qeverive nga vende të ndryshme të botës, kryesues të organizatave ndërkombëtare të angazhuara në mbrojtjen dhe promovimin e të drejtave të grave dhe vajzave, ku i ka informuar ata për planet e qeverisë dhe ;inistrisë në fuqizimin e grave në Republikën e Kosovës.

“She Decides” është platformë e ngritjes së fondeve me qëllim përkrahjen e vendeve në zhvillim, në mbrojtjen dhe promovimin e të drejtave të grave dhe vajzave në lidhje me shëndetin maternal dhe në përgjithësi në planifikimin e të ardhmes së tyre.

Konferenca është mundësi e mirë e afirmimit të zhvillimeve politikëbërëse në fushën e shëndetit dhe fuqizimit të gruas të Republikës së Kosovës, dhe mundësi e rrjetëzimit me qeveri dhe organizata të specializuara, si dhe mundësi që Kosova të përfitojë nga kjo konferencë.