Abdeslam posedonte dokumente rreth qendrës kërkimore bërthamore në Gjermani

Salah Abdeslam, i dyshuari kryesor për sulmet terroriste në Paris, raportohet se në banesën e tij në qarkun Molenbeek të Brukselit, kishte pasur dokumente rreth qendrës kërkimore bërthamore Julich në Gjermani, raportojnë mediat gjermane.

Julich gjendet në afërsi të kufirit belg dhe aty ruhen mbeturinat bërthamore, kurse kjo qendër në një deklaratë të lëshuar për media, thekson se nuk ka indikacione për ndonjë rrezik, duke shtuar se janë në kontakt të vazhdueshëm me autoritetet e sigurisë dhe inspektorët bërthamorë, transmeton Telegrafi.

Duke cituar burime nga komisioni për kontrollin parlamentar, grupi medial RND, ka bërë të ditur se Hans Georg Massen, kreu i agjencisë së brendshme gjermane të zbulimit BfV, gjatë muajit mars kishte deklaruar para Komitetit, se Abdeslam kishte poseduar dokumente në lidhje me qendrën kërkimore bërthamore.

Sipas këtij burimi, Massen i ka thënë Komitetit se është përgjegjës për monitorimin e punës së shërbimeve të inteligjencës gjermane, se në banesën e Abdeslam janë gjetur dokumente të printuara nga interneti dhe fotografi të drejtorit ekzekutiv të Julich, Wolfgang Markard. /Telegrafi/