Komuna e Prizrenit ka njoftuar se me zgjerimin e lagjes “Bajram Curri”, është rritur edhe nevoja për hapësira të reja mësimore në SHFMU “Fatmir Berisha” në Prizren.
Komuna e Prizrenit, ka bërë të ditur se përmes investimit të Drejtorisë Komunale të Arsimit është ndërtuar një aneks i ri dykatësh me katër dhoma mësimi.
Aneksi i ri është ndërlidhur me objektin ekzistues të shkollës dhe sallën e sportit, duke krijuar hapësira shtesë për zhvillimin e procesit mësimor.
Sipas komunës, salla e sportit, e cila është e dyta më e madhe në Komunën e Prizrenit pas Qendrës Sportive “Sezai Surroi”, tashmë ofron kushte më të mira për nxënësit që merren me aktivitete sportive.
Drejtoresha e Drejtorisë Komunale të Arsimit, Luljeta Veselaj-Gutaj, ka vizituar shkollën për të parë nga afër investimet e realizuara dhe përgatitjet para fillimit të vitit të ri shkollor 2026/2027.
Investimi synon përmirësimin e kushteve për nxënësit dhe krijimin e hapësirave më të përshtatshme për zhvillimin e procesit edukativo-arsimor në këtë shkollë. /Telegrafi/
