I dërguari i BE-së thotë që heqja e frazës për origjinën e coronavirusit në gazetën kineze është “për të ardhur keq”

Ambasadori i Bashkimit Evropian në Kinë tha të enjten se ishte “për të ardhur keq” që një pjesë e një opinioni, të shkruajtur nga 27 ambasadorë evropianë dhe i botuar në gazetën zyrtare China Daily ishte ndryshuar para botimit.

Sipas Reuters, përcjell Telegrafi, një krahasim midis versionit origjinal të ngarkuar në faqen e internetit të ambasadës së BE-së dhe asaj të botuar të martën nga China Daily tregoi se në një fjali “shpërthimi i coronavirusit”, fjalët që pasuan – “në Kinë, dhe përhapja e saj e mëvonshme në pjesën tjetër të botës gjatë tre muajve të fundit” – u hoqën.

“Është për të ardhur keq që një pjesë e fjalisë për përhapjen e virusit është redaktuar”, tha ambasadori i BE-së në Kinë, Nicolas Chapuis, para gazetarëve në një konferencë.

Ambasadorët e BE-së e kishin lansuar opinionin për të shënuar 45 vjetorin e marrëdhënieve diplomatike midis BE-së dhe Kinës.

Versioni i plotë shfaqet në faqet e internetit të ambasadave të BE-së në Kinë, përfshirë atë të ambasadës franceze.

Chapuis nuk pranoi të komentojë pse fjalët mund të jenë fshirë.

Një diplomat i lartë i BE-së i tha Reuters se ndryshimi lindi nga censura nga autoritetet kineze por ambasadorët individualë të BE-së nuk ishin konsultuar siç duhet nëse do të vazhdonin me botimin në China Daily, pavarësisht censurave.

Ndërkaq Komisioni Evropian, ekzekutivi i BE-së, mbrojti vendimin e delegacionit të BE-së në Pekin të enjten.

“Delegacioni i BE-së vendosi megjithatë të vazhdojë me botimin e opinionit pavarësisht ngurrimit të konsiderueshëm pasi u konsiderua e rëndësishme për të komunikuar mbi politikat kryesore të BE”, tha Komisioni në raportin e tij të përditshëm të lajmeve në Bruksel.

Komisioni tha se pjesa e opinionit, megjithëse e censuruar, ende sqaroi shqetësimet e BE-së për të drejtat e njeriut në Kinë, si dhe pikëpamjet e BE-së për politikat e ndryshimit të klimës dhe përgjigjen ndaj pandemisë së coronavirusit.

Kina është në një “luftë” me Shtetet e Bashkuara për shkak të shpërthimit, përfshirë origjinën e virusit, që është gjurmuar në një treg në qytetin qendror kinez, Wuhan./Telegrafi/