2Cellos sjellin me violinçelë hitin “Perfect” të Ed Sheeran

Dyshja e famshme kroate, “2Cellos”, e ka publikuar videon muzikore të këngës së re, versionin e tyre të hitit të madh të Ed Sheeran, “Perfect”, që do të jetë pjesë e albumit të tyre të ri.

“Meqenëse kemi pasur menaxhment të njëjtë, ka kohë që njihemi me Ed Sheeran. Jemi shoqëruar shumë, madje kemi luajtur bixhoz bashkë në Las Vegas”.

“Na ka pyetur shpesh se kur do ta përpunojmë ndonjë këngë të tij dhe tash ishte çasti i përsosur”.

“Kudo që kemi shkuar në muajt e fundit e kemi dëgjuar ‘Perfect’ dhe menduam se ajo këngë meriton versionin në violinçelë”.

“Sapo u kthyem nga turneu në Amerikë, hymë në studio dhe e incizuam. Kënga origjinale ka një melodi të shkëlqyer dhe tempo, prandaj e dinim se do të tingëllonte bukur në violinçelë”.

“Gjykoni vet. Ne mendojmë se përshtatet për mrekulli. Shpresojmë që edhe Edi të pajtohet me këtë”, ka thënë Stjepan Hauser, i cili së bashku me Luka Sulic janë duke punuar në albumin e ri.

“2Cellos” nuk ia kanë dërguar këngën më herët Sheeranit, sepse kanë dashur të befasojnë. Klipi është xhiruar në Muzeun Katran në Zagreb, ndërsa regjinë e ka bërë Kristijan Burlovic dhe produksioni MedVid.

Videoklipi i këngës origjinale të Ed Sheeran u publikua në nëntor të vitit të kaluar, ndërsa tashmë ka kaluar shifrën prej 772 milionë shikimesh në YouTube. /Telegrafi/