Zhvillimet në veri – Osmani takohet me ambasadorin amerikan, Hovenier

Presidentja Vjosa Osmani, ka pritur në takim ambasadorin e SHBA-së, Jeffrey Hovenier.

Siç njofton Presidenca, në takim është biseduar për zhvillimet e fundit në veri të vendit.

Osmani nënvizoi përkushtimin e institucioneve të Republikës së Kosovës për të garantuar mjedis të sigurt për të gjithë qytetarët e vendit në koordinim të plotë me Shtetet e Bashkuara të Amerikës dhe aleatët evropian.

Ndërkaq, të dielën, Ambasada amerikane në Prishtinë theksoi se tërheqja e serbëve të Kosovës nga institucionet e Kosovës nuk është zgjidhje e mosmarrëveshjeve aktuale dhe ka potencial për të përshkallëzuar më tej tensionet në terren.

“Të gjitha palët e përfshira duhet të ndërmarrin hapa për të ulur tensionet dhe për të siguruar paqen dhe stabilitetin. Veprimet dhe retorika që rrisin mundësinë e dhunës vënë në rrezik të panevojshëm jetët e pafajshme dhe ato të forcave paqeruajtëse ndërkombëtare”, thuhet më tej në përgjigjen për Telegrafin.

Ambasada ka thënë se Shtetet e Bashkuara i bashkohen BE-së duke u bërë thirrje përfaqësuesve të Serbisë dhe serbëve të Kosovës që të respektojnë detyrimet e tyre të dialogut dhe të kthehen në institucionet e Kosovës për të përmbushur detyrat e tyre, duke përfshirë policinë, gjyqësorin dhe administratat lokale.

Në të njëjtën kohë, Ambasada ka theksuar se SHBA-ja është një linjë me BE-në sa i përket kërkesës ndaj Qeverisë së Kosovës për shtyrje të zbatimit të vendimit për targat.