Zëvendësministrja e Shëndetësisë: Jemi pranë qytetarëve të Deçanit deri në përmirësimin e gjendjes dhe eliminimin e burimit të infeksionit

Zëvendësministrja e Ministrisë së Shëndetësisë, Dafina Gexha-Bunjaku, tha se lajmi i mirë është se të gjithë qytetarët që kanë kërkuar ndihmë në QKMF në Deçan nuk kanë pasur nevojë për hospitalizim dhe gjendja shëndetësore e tyre është e mirë.

Gexha-Bunjaku ka thënë se Ministria e Shëndetësisë do të jetë afër qytetarëve të Deçanit në çdo moment deri në përmirësimin e gjendjes dhe eliminimin e burimit të infeksionit

“IKSHPK po punon vazhdimisht në evidentimin e shkakut të kontaminimit të ujit të pijes për ato fshatra. Në të njëjtën kohë QKMF e Deçanit dhe spitali i përgjithshëm i Pejës janë vënë në dispozicion të plotë të shërbimit të qytetarëve dhe janë siguruar të gjithë parametrat mjekësore në mbështetje të autoriteteve lokale dhe unë jam këtu për të siguruar se MSH do të jetë afër jush në çdo moment deri në përmirësimin e gjendjes dhe eliminimin e burimit të infeksionit”.

“Ne si MSH jemi duke përcjell me vëmendje situatën dhe bashkë me IKSHPK dhe me institucionet tjera relevante do të vazhdojë monitorimin dhe hulumtimin e rastit”, tha ajo.