Zëdhënësi i LDK-së kërkon mobilizimin e mbështetësve për të siguruar fitoren në zgjedhje

Lidhja Demokratike e Kosovës ka mbajtur konferencën e rregullt lidhur me fushatën zgjedhore.

Zëdhënësi i këtij sbujekti, Besian Mustafa, ka ftuar përkrahësit e LDK-së që të angazhohen aktivisht në ditët e fundit të fushatës, duke u kërkuar atyre të bindin të paktën një person tjetër për të votuar për LDK, në ditën e zgjedhjeve.

“Detyra juaj është që të bindni edhe një person tjetër që këtë të diele ta votojë për LDK-në. Ne kemi nevojë që ju të punoni me gjithë fuqinë tuaj këtë javë”, tha Mustafa.

Ai theksoi se LDK-ja është alternativa e vetme për një të ardhme më të ndritur për Kosovën.

“Flisni me të gjithë që njihni, të rrethit tuaj të ngushtë e të gjerë dhe shpjegoni atyre pse LDK është alternativa e vetme për një të ardhme më të ndritur për Kosovën. Dhe këtë të diele, me 9 shkurt, ju duhet të siguroheni që gjithsecili të dalin dhe të votojnë për LDK-në. Nëse secili prej jush, mbështetësit tanë, sillni edhe një shok apo familjar më shumë për ta votuar LDK-në, ne do t’i fitojmë këto zgjedhje”, u shpreh Mustafa. /Telegrafi/