Studimi i ri tregon se beta-HPV mund të integrohet në ADN dhe të nxisë zhvillimin e kancerit, veçanërisht tek personat me imunitet të dobësuar
Shkencëtarët kanë arritur në një zbulim mbresëlënës që mund të ndryshojë mënyrën si e kuptojmë një nga format më të shpeshta të kancerit në botë.
Një tip i zakonshëm i virusit human papilloma (HPV), i njohur si beta-HPV, mund të jetë shumë më i rrezikshëm se sa mendohej më parë.
Deri më tani besohej se ky virus thjesht përkeqësonte dëmtimet e lëkurës të shkaktuara nga rrezatimi UV. Por një studim i ri tregon se ai mund të marrë drejtpërdrejt kontrollin mbi qelizat dhe të nxisë zhvillimin e kancerit.
Një kthesë e papritur në rastin e një pacienteje
Këto informacione dolën nga rasti i një gruaje 34-vjeçare, e cila po luftonte me karcinomën e qelizave skuamoze (cSCC) në ballë. Pavarësisht shumë operacioneve dhe imunoterapisë, tumoret i riktheheshin vazhdimisht.
Një analizë e detajuar gjenetike zbuloi një fakt tronditës: beta-HPV ishte integruar drejtpërdrejt në ADN-në e qelizave të kancerit, duke prodhuar proteina që përshpejtonin përparimin e sëmundjes. Ky është rasti i parë i konfirmuar ku beta-HPV është integruar në ADN-në qelizore dhe ka marrë pjesë aktive në ruajtjen e kancerit, raporton Science Alert, përcjell Telegrafi.
Roli kyç i sistemit imunitar të dobësuar
Pacientja kishte një çrregullim të rrallë imunitar të trashëguar, që pengonte qelizat T, mbrojtësit kryesorë kundër infeksioneve - të sulmonin HPV-në. Edhe pse trupi i saj riparonte me sukses dëmtimet nga rrezatimi UV, imuniteti i dobët i lejoi virusit të përhapej dhe të merrte kontrollin.
Për pasojë, ajo vuante edhe nga simptoma të tjera të HPV-së, si lythat në lëkurë dhe në gojë.
“Kjo tregon se mund të ketë edhe persona të tjerë me formë agresive të cSCC-së, të cilët kanë defekte bazë imunitare dhe që mund të përfitojnë nga terapitë e fokusuara tek sistemi imunitar,” theksoi Andrea Lisco, specialiste e imunologjisë në Institutin Kombëtar Amerikan për Alergji dhe Sëmundje Infektive (NIAID).
Terapia revolucionare dhe shërimi i plotë
Pasi u zbulua shkaku i vërtetë i sëmundjes, mjekët aplikuan një terapi të synuar, transplantimin e qelizave staminale të palcës kockore për të zëvendësuar qelizat T të dëmtuara me qeliza të shëndetshme.
Trajtimi pati sukses të jashtëzakonshëm: jo vetëm që agresiviteti i kancerit të lëkurës u zhduk, por u zhdukën edhe të gjitha simptomat e tjera të HPV-së. Gjatë tre viteve të ndjekjes, nuk pati asnjë shenjë rikthimi të sëmundjes.
“Kjo arritje nuk do të ishte e mundur pa bashkëpunimin e virusologëve, imunologëve, onkologëve dhe ekspertëve të transplantit, të gjithë punuan nën të njëjtin çati,” tha Lisco.
Çfarë do të thotë kjo për të ardhmen e trajtimit të kancerit?
Edhe pse rrezatimi UV mbetet shkaktari kryesor i kancerit të lëkurës, ky studim tregon se në raste të rralla, viruse si beta-HPV mund të kenë rol vendimtar, veçanërisht tek individët me sistem imunitar të dobësuar.
Zbulimi thekson edhe një herë rëndësinë e qasjes së personalizuar në trajtimin e kancerit, e cila po rezulton më efikase se metodat standarde. Për më tepër, jep shpresë për përmirësimin e luftës kundër viruseve si alfa-HPV, që shkakton kancerin e qafës së mitrës, sidomos duke pasur parasysh se vaksinimi ka ulur ndjeshëm vdekshmërinë.
“Kjo mund të ndryshojë tërësisht mënyrën si mendojmë për zhvillimin dhe trajtimin e cSCC-së tek pacientët me funksion të dëmtuar imunitar,” përfundoi Lisco. /Telegrafi/
