David Alaba mund të ketë një rol të ri te Real Madridi gjatë këtij sezoni nën urdhrat e Xabi Alonsos.
Sipas të përditshmes spanjolle Marca, trajneri Xabi Alonso po shqyrton mundësinë që ta përdorë 33-vjeçarin në qendër të mesfushës, larg pozitës së tij tradicionale në mbrojtje.
Sinjalet për këtë ndryshim erdhën gjatë miqësores së fundit kundër Leganes, të fituar 4-1 nga madrilenët. Alaba u aktivizua në pjesën e dytë dhe u vendos në mesfushë, duke treguar qartësisht se ky mund të jetë një skenar që Alonso do ta testojë edhe në ndeshje të tjera.
Ky pozicion nuk është i ri për austriakun. Ai ka luajtur si mesfushor edhe më parë te Bayern Munich dhe Hoffenheim, në një periudhë kur vetë Alonso ishte pjesë e skuadrës bavareze. Eksperienca në atë rol i jep trajnerit madrilen garanci se Alaba mund të përshtatet shpejt.
Arsyet që po e shtyjnë Alonson drejt këtij ndryshimi lidhen me situatën aktuale në repartin defensivë.
Afrimi i Dean Huijsen si dhe rikthimi nga lëndimi i Eder Militaos ka bërë që qendra e mbrojtjes të jetë e ngarkuar së bashku edhe me Antonio Rudiger dhe Raul Asencio.
Kjo e bën më të lehtë zhvendosjen e Alabës në një sektor ku aftësitë e tij teknike dhe vizioni i lojës mund të shfrytëzohen më shumë.
Austriaku ka pasimin e gjatë dhe qetësinë për të nisur aksione nga zona qendrore e fushës, elemente që Alonso i vlerëson lart.
Për momentin, nuk ka një vendim zyrtar për ta bërë këtë ndryshim të përhershëm, por minutat kundër Leganes dhe raportimet nga mediat spanjolle sugjerojnë se trajneri po e sheh si një alternativë të besueshme. /Telegrafi/
